പ്ലസ് വൺ വിദ്യാർത്ഥിനിക്ക് നേരെ സദാചാര ഗുണ്ടായിസം; ഏഴ് പേർക്കെതിരെ കേസ്

ബാലുശ്ശേരിയിൽ പ്ലസ് വൺ വിദ്യാർഥിക്കും ബന്ധുവിനും നേരെ സദാചാര ഗുണ്ടായിസം. വിദ്യാർഥിനിയും ബന്ധുവായ യുവാവും റോഡിൽ നിന്ന് സംസാരിച്ചതിനെ ചോദ്യംചെയ്തെത്തിയ സിപിഎം ബ്രാഞ്ച് സെക്രട്ടറി പി എം രതീഷിന്റെ നേതൃത്വത്തിലുള്ള സംഘം യുവാവിനെ മർദ്ദിക്കുകയായിരുന്നു. പരിക്കേറ്റ യുവാവും പെൺകുട്ടിയും ആശുപത്രിയിൽ ചികിത്സ തേടി. പെൺകുട്ടിയുടെ പരാതിയുടെ അടിസ്ഥാനത്തിൽ പി എം രതീഷ, വിപിൻ ലാൽ, കണ്ടാലറിയാവുന്ന ഓട്ടോ ഡ്രൈവർ ഉൾപ്പെടെ ഏഴ് പേർക്കെതിരെ ബാലുശ്ശേരി പൊലീസ് കേസ് എടുത്തു. ബിഎൻഎസ് 74,190, 351 (2) തുടങ്ങി വിവിധ വകുപ്പുകൾ പ്രകാരമാണ് കേസ് എടുത്തത്. തിങ്കളാഴ്ചയാണ് കേസിനാസ്പദമായ സംഭവം നടന്നത്. സ്കൂൾ വിട്ട് നടന്നു പോകുന്നതിനിടെ വഴിയിൽവെച്ച് കുട്ടി ബന്ധുവിനെ കാണുകയും സംസാരിക്കുകയുമായിരുന്നു. ഇതിനിടെയാണ് പി എം രതീഷും സംഘവും എത്തി ചോദ്യം ചെയ്യാൻ ആരംഭിച്ചത്. സഹോദരനാണ് എന്ന് പറഞ്ഞിട്ടും അസഭ്യം പറയുകയും മർദ്ദിച്ചെന്നും വിദ്യാർഥിനിയുടെ പരാതിയിലുണ്ട്. വിദ്യാർഥി പഠിക്കുന്ന സ്കൂളിലെ മുൻ പിടിഎ പ്രസിഡന്റ് കൂടിയാണ് രതീഷ്.