സിനിമ നടന്‍ മുകേഷ് എംഎല്‍എ സ്ഥാനം രാജി വെയ്ക്കണമെന്ന് യുവകലാസാഹിതി. കുറ്റാരോപിതർ രാജിവെയ്ക്കണം എന്ന യുവകലാസാഹിതി മുദ്രാവാക്യം നിലനിൽക്കെ തന്നെ ആരൊക്കെ രാജി വെച്ചാലും ഇല്ലെങ്കിലും ഇടതുപക്ഷ ലേബലിൽ എംഎല്‍എ ആയ മുകേഷ് ധാർമ്മികതയുടെ പേരിൽ നിർബന്ധമായും ആ സ്ഥാനം രാജി വെയ്ക്കണമെന്ന് യുവകലാസാഹിതി സംസ്ഥാന പ്രസിഡന്റ് ആലങ്കോട് ലീലാകൃഷ്ണൻ പറഞ്ഞു.
യുവകലാസാഹിതി ജില്ലാ കമ്മിറ്റി സംഘടിപ്പിച്ച ‘സിനിമാസംരക്ഷണ കൂട്ടായ്‌മ’ ഉദ്‌ഘാടനം ചെയ്ത് സംസാരിക്കുകയായിരുന്നു അദ്ദേഹം. യുവകലാസാഹിതി ജില്ലാ പ്രസിഡന്റ് ഡോ.എസ്.ഗിരീഷ്കുമാർ അധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ഡോ.വത്സലൻ വാതുശ്ശേരി, സംസ്ഥാന സെക്രട്ടറി സി വി പൗലോസ്, ഡോ. കെ.രത്നകുമാരി, വനിതാ കലാസാഹിതി ജില്ലാ സെക്രട്ടറി സി ജി ജ്യോതിലക്ഷ്മി, ജില്ലാ ഭാരവാഹികളായ ജി.ബി.കിരൺ, ഇ.ആർ.ജോഷി, ഡോ.ജവഹർലാൽ, സുധീർ ഗോപിനാഥ്, ഷാജി കാക്കശ്ശേരി എന്നിവര്‍ സംസാരിച്ചു.