മുസ്ലിം ലീഗിന് ഉപമുഖ്യമന്ത്രി സ്ഥാനം വേണം; പാർട്ടിക്ക് അതിനുള്ള അർഹതയുണ്ടെന്നും കെഎൻഎ ഖാദർ

യുഡിഎഫ് അധികാരത്തിൽ വന്നാൽ ഉപമുഖ്യമന്ത്രി സ്ഥാനം മുസ്ലിം ലീഗിന് വേണമെന്നും പാർട്ടിക്ക് അതിനുള്ള അർഹതയുണ്ടെന്നും
മുൻ എംഎൽഎയും മുസ്ലിം ലീഗ് നേതാവുമായ കെ എൻ എ ഖാദർ. നേരത്തെ ഉപമുഖ്യമന്ത്രി പദവി ആവശ്യമുണ്ടോ എന്ന് ഉമ്മൻ ചാണ്ടി കുഞ്ഞാലിക്കുട്ടിയോട് ചോദിച്ചിട്ടുണ്ട്. ലീഗിന്റെ പ്രകടനം കണക്കിലെടുത്ത് വിഷയം മുന്നണി പരിഗണിക്കണം. ഉപമുഖ്യമന്ത്രി എന്നത് ആലങ്കാരിക പദവി പോലെയാണ്. മുസ്ലിം ലീഗിനെ അർഹമായ പദവിയിൽ പ്രതിഷ്ഠിക്കണം എന്ന ധാരണ മറ്റുളവർക്ക് ഉണ്ടെങ്കിൽ അത് നടക്കും. അതിനുള്ള സ്റ്റാറ്റസും അർഹതയും മുസ്ലിം ലീഗിന് ഉണ്ടെന്നും അദ്ദേഹം പറഞ്ഞു.