നെഹ്റു ട്രോഫി വള്ളംകളിയുടെ തീയതി മാറ്റം അനിശ്ചിതത്വത്തിൽ തുടരുന്നു. ഈ വർഷം ഓഗസ്റ്റ് 30‑ന് മത്സരം നടത്താൻ നെഹ്റു ട്രോഫി ബോട്ട് റേസ് സൊസൈറ്റി എക്സിക്യൂട്ടീവ് കമ്മിറ്റിയിൽ ധാരണയിലെത്തിയെങ്കിലും, അന്തിമ തീരുമാനം ഇതുവരെ ഉണ്ടായിട്ടില്ല. ഏപ്രിലിൽ ചേർന്ന യോഗത്തിലാണ് പ്രകൃതിക്ഷോഭം അടക്കമുള്ള സാധ്യതകൾ കണക്കിലെടുത്ത്, ഓഗസ്റ്റ് രണ്ടാം ശനിയാഴ്ചയെന്ന പതിവ് രീതി മാറ്റി പുതിയ തീയതിയിലേക്ക് മാറാൻ ധാരണയായത്.
ഓണത്തിന് മുന്നോടിയായി വള്ളംകളി നടത്തിയാൽ പരസ്യവരുമാനത്തിലും ടിക്കറ്റ് വിൽപനയിലും വർധനയുണ്ടാകുമെന്നാണ് സംഘാടകരുടെ കണക്കുകൂട്ടൽ. തീയതിയിൽ വ്യക്തത വന്നാൽ മാത്രമേ സംഘാടകസമിതിക്ക് നടത്തിപ്പുമായി മുന്നോട്ടുപോകാൻ കഴിയൂ.
അതിനിടെ, ജൂലൈ ഒമ്പതിന് വള്ളംകളി സീസണിന് തുടക്കമിടുന്ന ചമ്പക്കുളം മൂലം വള്ളംകളിയുടെ മുന്നൊരുക്കവും ഏങ്ങുമെത്തിയില്ലെന്ന് പരാതിയുണ്ട്. മത്സരം ഓണത്തിന് മുമ്പ് നടത്തണമെന്നാണ് വള്ളംകളി സമിതിയുടെയും ക്ലബുകളുടെയും പ്രധാന ആവശ്യം.