നിന്നെയോർത്ത്

വർഷം തിമിർക്കുന്ന രാത്രിയിൽ നെഞ്ചോടു
പറ്റിക്കിടന്നും പതിയെപ്പുണർന്നുമ-
ന്നിഷ്ടം നടിക്കാതെ നെറ്റിമേൽ ചിന്നിയ
കട്ടക്കരിമുടിയോരോന്നു നുള്ളിയും
നേരിന്റ കൈവഴിയ്ക്കിട്ടു തിരിച്ചെത്തി
വീണ്ടും പിടഞ്ഞൊന്നു മൂകം വലിഞ്ഞെന്റെ
നെറ്റിമേലുമ്മവച്ചോരോന്നു ചൊല്ലിയും;
കൊച്ചുകിടാവിനെ താരാട്ടിയൂട്ടുവാ-
നുള്ളിലൊരുഷ്ണ പ്രവാഹമുണ്ടെന്നുമെ -
ന്നോമലേ ചൊല്ലിയതോർമ്മയുണ്ടിപ്പൊഴും.
അക്ഷരം തൊട്ടറിഞ്ഞർത്ഥം ഗ്രഹിക്കാതെ-
യുമ്മറത്തെത്തിയകാറ്റിന്റെ കൊമ്പത്തു-
ചുമ്മാതെ കോറിക്കൊറിച്ചവയ്ക്കൊക്കെയ-
ന്നാഴിതന്നാഴത്തിന്നറിവുണ്ടെങ്കിലും
ഒരു സൂര്യനണിയുന്ന പൊലിമയുണ്ടെങ്കിലു-
മിരുവഴിയ്ക്കായന്നു, മിഴപൊട്ടിയകലവേ,
ഓമലേ,യോർക്കുവാനോർമ്മകൾ മാത്രമു-
ണ്ടോർമ്മയിലൂറും കിനാക്കളുണ്ടിപ്പൊഴും.
കൂട്ടായിരാത്രിയിലൊന്നിച്ചിരുന്നൊരീ
മാത്രയിലെങ്ങാനുമോർത്തുവോയിങ്ങനെ
ദൂരത്തിരുന്നെന്നുമോരോന്നു ചൊല്ലാനും
ഓർക്കുവാനും മിഴിപൊട്ടിക്കരയാനും
ഇത്രമേലോമലേ ജീവിതയാത്രയിൽ
കഷ്ടനഷ്ടങ്ങൾ വിരുന്നുറങ്ങും മുമ്പ്,
നമ്മൾ ചുവടെറിഞ്ഞൊന്നിച്ചളന്നിട്ട
തീരത്തു നിൽക്കുമ്പോളോമലേ നീയെന്റെ
ഉള്ളിന്റെ, യുള്ളകത്തെത്തിനോക്കാൻ കൊതി-
ച്ചെത്തുന്ന പുലരിയാ, യുണരുന്നുണ്ടിപ്പൊഴും!