ഭക്ഷണവും പാചകവാതകവുമില്ലാതെ പ്രതിസന്ധിയിലായ ശ്രീലങ്കന്‍ ജനത മെച്ചപ്പെട്ട ജീവിതത്തിനായി നാട് വിടാനൊരുങ്ങുന്നു. മെച്ചപ്പെട്ട ജീവതത്തിനായി മറ്റേതെങ്കിലും രാജ്യത്ത് അഭയം തേടാന്‍ പാസ്പോര്‍ട്ടിനായി നെട്ടോട്ടമോടുകയാണ് ഭൂരിഭാഗം ശ്രീലങ്കന്‍ ജനതയും.
പാസ്‍പോർട്ട് ലഭിക്കാൻ എമിഗ്രേഷൻ വിഭാഗത്തിന് മുന്നിൽ ദിവസങ്ങളോളം നീണ്ട നിരയാണുള്ളത്. രണ്ടു ദിവസമായി ശ്രമിച്ചിട്ടും അപേക്ഷ നൽകാൻ കഴിയാത്ത സ്ഥിതിയാണെന്നും ആളുകൾ പറയുന്നു.
കുവൈത്തിൽ ജോലി നോക്കാനാണ് ടെക്സ്റ്റയിൽ ജീവനക്കാരിയായ ആർഎംആർ ലെനോര(33) പാസ്‍പോർട്ടിന് അപേക്ഷിക്കാൻ തീരുമാനിച്ചത്. പാചകക്കാരനായിരുന്നു ഭർത്താവ്. വിലപ്പെരുപ്പവും പാചകവാതക ക്ഷാമവും മൂലം റെസ്റ്റോറന്റ് അടച്ചു. ഇതോടെ കുട്ടികള്‍ ഉള്‍പ്പെടെയുള്ളവര്‍ പട്ടിണിയിലായതായി ലെനോര പറയുന്നു.
രാത്രി ഉറക്കം പോലുമില്ലാതെയാണ് പലരും പാസ്പോർട്ടിനായി വരി നിൽക്കുന്നത്. 2022 ആദ്യ അഞ്ചുമാസത്തിനുള്ളിൽ 288,645 പാസ്‍പോർട്ടുകളാണ് ശ്രീലങ്ക അനുവദിച്ചത്.
കഴിഞ്ഞ വർഷം ഇതേകാലയളവിൽ 91,331പേർക്കാണ് പാസ്‍പോർട്ട് അനുവദിച്ചത്. അപേക്ഷകരുടെ എണ്ണം കുത്തനെ വർധിച്ചതിനാൽ പാസ്‍പോർട്ട് ഓഫിസിൽ ജീവനക്കാർക്ക് ജോലിഭാരം വർധിച്ചിരിക്കയാണ്. കുറച്ചുമാസങ്ങളായി ഓൺലൈൻ വഴി അപേക്ഷ നൽകാനുള്ള സംവിധാനം പ്രവർത്തനക്ഷമമല്ല.
English summary;No food or cooking gas; People of Sri Lanka give application to passports for a better life
You may also like this video;
