ഒഡിഷയിലെ ബാലാസോര് ജില്ലയിൽ തീവണ്ടികൾ പാളം തെറ്റി കൂട്ടിയിടിച്ചതു മൂലം നിരവധി യാത്രക്കാർ മരിച്ചതും ഒട്ടേറെ പേർക്ക് ഗുരുതരമായി പരിക്കേറ്റതുമായ ദുരന്തം നമ്മുടെ നാടിനെ നടുക്കുന്നതും ദുഃഖത്തിലാഴ്ത്തുന്നതുമാണെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്. ആവർത്തിക്കപ്പെടുന്ന ട്രെയിൻ അപകടങ്ങളിൽ നിരവധി പേരുടെ ജീവനുകളാണ് നഷ്ടപ്പെടുന്നതും കുടുംബങ്ങൾ അനാഥമാകുന്നതും.
ഏറ്റവും ആധുനികമായ ശാസ്ത്രസാങ്കേതിക സൗകര്യങ്ങൾ പ്രയോജനപ്പെടുത്തിക്കൊണ്ട് സിഗ്നൽ സിസ്റ്റം ഉൾപ്പടെ റെയിൽവേയെ ആധുനികവൽക്കരിക്കാനും കൂടുതൽ സുരക്ഷാക്രമീകരണങ്ങൾ ഏർപ്പെടുത്താനും ഒട്ടും വൈകിക്കൂടെന്ന് അപകടങ്ങൾ നമ്മെ ഓർമ്മിപ്പിക്കുന്നുവെന്നും കാനം ഫേസ്ബുക്ക് പോസ്റ്റില് പറഞ്ഞു.
ട്രെയിൻ അപകടത്തിൽ മരിച്ചവരുടെ കുടുംബങ്ങളുടെ ദുഃഖത്തിൽ പങ്ക് ചേരുകയും അനുശോചനം രേഖപ്പെടുത്തുകയും ചെയ്യുന്നു. പരിക്കേറ്റ് ചികിത്സയിൽ കഴിയുന്നവർ എത്രയും വേഗം സുഖം പ്രാപിക്കട്ടെയെന്നും അദ്ദേഹം പറഞ്ഞു.
English Summary:Odisha train tragedy painful: Kanam Rajendran