പ്രവാസികേരളീയര്ക്കായി സംസ്ഥാന സര്ക്കാര് നോര്ക്ക റൂട്ട്സ് വഴി നടപ്പിലാക്കുന്ന സമഗ്ര ആരോഗ്യ അപകട ഇൻഷുറൻസ് പദ്ധതി നോർക്ക കെയറിന്റെ പ്രചരണാര്ത്ഥം സംഘടിപ്പിക്കുന്ന നോര്ക്ക കെയര് മീറ്റ് ‘കരുതലിന്റെ സന്ദേശം’ ഇന്ന് ഡല്ഹിയില് നടക്കും. ഡല്ഹിയിലെ വിവിധ പ്രവാസി സംഘടനകളും മലയാളി കൂട്ടായ്മകളും കൈകോർക്കുന്ന ‘കരുതലിന്റെ സന്ദേശം’ മീറ്റ് നോര്ക്ക റൂട്ട്സ് റസിഡന്റ് വൈസ് ചെയര്മാന് പി ശ്രീരാമകൃഷ്ണന് ഉദ്ഘാടനം ചെയ്യും.
ഡല്ഹി കേരള ഹൗസില് വൈകുന്നേരം 6.30 ന് നടക്കുന്ന സംഗമത്തില് ഡല്ഹിയിലെ കേരള സര്ക്കാറിന്റെ പ്രത്യേക പ്രതിനിധി പ്രൊഫ കെ വി തോമസ്, കേരള ഹൗസ് റസിഡന്റ് കമ്മീഷണർ പുനീത് കുമാർ, നോര്ക്ക റൂട്ട്സ് ചീഫ് എക്സിക്യൂട്ടീവ് ഓഫീസര് അജിത് കോളശ്ശേരി, ലോക കേരള സഭ അംഗങ്ങള്, എന് ആര്.കെ ഡെവലപ്പ്മെന്റ് ഓഫീസർ ഷാജിമോന് ജെ, നോര്ക്ക റൂട്ട്സ് പ്രതിനിധികള് ഉള്പ്പെടെയുളളവര് സംബന്ധിക്കും.
ഭാര്യ ഭര്ത്താവ് ഒരു കുടുംബത്തിന് (ഭര്ത്താവ്, ഭാര്യ, 25 വയസ്സില് താഴെയുളള രണ്ടു കുട്ടികള്) 13,411 പ്രീമിയത്തിൽ അഞ്ച് ലക്ഷം രൂപയുടെ ആരോഗ്യ ഇന്ഷുറന്സും 10 ലക്ഷം രൂപയുടെ ഗ്രൂപ്പ് പേഴ്സണല് അപകട ഇന്ഷുറന്സ് പരിരക്ഷയും ഉറപ്പാക്കുന്നതാണ് നോര്ക്ക കെയര് പദ്ധതി. കേരളത്തിലെ 500 ലധികം ആശുപത്രികള് ഉള്പ്പെടെ രാജ്യത്തെ 16,000 ത്തോളം ആശുപത്രികള് വഴി ക്യാഷ്ലെസ്സ് ചികിത്സയും നോര്ക്ക കെയര് ലഭ്യമാക്കുന്നു. പദ്ധതിയില് 2025 ഒക്ടോബര് 30 വരെയാണ് അംഗമാകാന് കഴിയുക. കേരളപ്പിറവി ദിനമായ നവംബർ ഒന്നു മുതൽ നോര്ക്ക കെയര് പരിരക്ഷ പ്രവാസികേരളീയര്ക്ക് ലഭ്യമാകും. സാധുവായ നോര്ക്ക പ്രവാസി ഐ.ഡി, സ്റ്റുഡന്റ് ഐ.ഡി. എന്.ആര്.കെ ഐ.ഡി കാര്ഡുളള പ്രവാസികള്ക്ക് നോര്ക്ക കെയറില് അംഗമാകാം. പദ്ധതിയുടെ പ്രചരണാര്ത്ഥം ഡല്ഹി, മുംബൈ, ബംഗളൂരു, ചെന്നൈ നോര്ക്ക റൂട്ട്സ് എന് ആര് ഡവലപ്മെന്റ് ഓഫീസുകളുടെ നേതൃത്വത്തിലും ആഗോളതലത്തില് പ്രവാസി സംഘടനകളുടെ നേതൃത്വത്തിലും പ്രത്യേകം രജിസ്ട്രേഷന് ക്യാമ്പുകളും സംഘടിപ്പിച്ചുവരുന്നു.