പരിക്രമണങ്ങൾ

ഏതു വാഗ്ദത്ത ഭൂമിയുടെ നിരാസംകൊണ്ടാവും
ആകാശമിന്ന് ഇത്രയും വിളറിവെളുത്തത്? !
നടന്നു കുഴഞ്ഞു പോയ
പാതകൾക്കിരുപുറവും
ആരാണ് അപൂർണ്ണതകൾ മാത്രം
നട്ടു വളർത്തിയത്..?!

വാക്കുകളുടെ മണൽക്കാടുകളിൽ
ഘനീഭവിച്ച ഉപ്പുപരലുകൾ തൂവിപ്പരക്കുന്നത്
ഏത് അമാവാസിയിലാണ്?!

മൗനം കോർത്തുവച്ച ആത്മഗതങ്ങളുടെ
പതുപതുത്ത ഇടനാഴികളിൽ
സ്ഥായിയായ നിശ്ശബ്ദത പുരട്ടിവയ്ക്കുന്നത്
ആരുടെ വിരലുകളായിരിക്കും?!

പകച്ച കണ്ണുകളിൽ
കവിതകളുടെ ഇരുണ്ട പുഴയാഴങ്ങൾ പുനർജ്ജനിക്കുന്നത്
എവിടെനിന്നാണ്?!

കാടു പൂത്ത മണങ്ങൾ
അവസാനത്തെ കലാപത്തിനൊരുങ്ങുമ്പോൾ
ഏത് വിജനതയിലാണ്
നമ്മുടെ പ്രണയത്തിന്റെ പച്ചകൾ
പൊടിച്ചു തുടങ്ങുക..?!

നേരവും കാലവും വെളുത്തിരുളുമ്പോഴും
ഒരു കുതിരയെപ്പോലും പൂട്ടാത്ത
രഥത്തിൽ നമ്മൾ പരിക്രമണങ്ങൾ
നടത്തിക്കൊണ്ടേയിരിക്കും.!!!