നഗരത്തിൽ സ്വകാര്യ ബസ്സുകളുടെ മത്സരയോട്ടം വീണ്ടും ഒരു ജീവൻ കവർന്നു. കളമശ്ശേരിയിൽ ബസ്സിനടിയിൽപ്പെട്ട് ഓൺലൈൻ ഫുഡ് ഡെലിവറി ജീവനക്കാരനായ കൊടുങ്ങല്ലൂർ സ്വദേശി അബ്ദുൽ സലാം മരിച്ചു. രാവിലെ ഒൻപതരയോടെയായിരുന്നു കളമശ്ശേരിയിൽ അപകടം. ആലുവയിലേക്ക് സർവീസ് നടത്തുന്ന ‘ബിസ്മില്ല’ എന്ന സ്വകാര്യ ബസ്സ് അബ്ദുൽ സലാം ഓടിച്ചിരുന്ന ബൈക്കിനെ മറികടക്കാൻ ശ്രമിക്കുന്നതിനിടെയാണ് അപകടം സംഭവിച്ചത്. അപകടമുണ്ടാക്കിയ ബസ്സ് പത്തടിപ്പാലം മുതൽ മറ്റൊരു ബസ്സുമായി മത്സരയോട്ടത്തിലായിരുന്നുവെന്ന് ദൃക്സാക്ഷികൾ പറഞ്ഞു. സൗത്ത് കളമശ്ശേരി റെയിൽവേ പാലത്തിന് സമീപത്ത് വെച്ചാണ് ബസ് അബ്ദുൽ സലാമിനെ ഇടിച്ചിട്ടത്. നിലത്തുവീണ അദ്ദേഹത്തിന്റെ തലയിലൂടെ ബസ്സിന്റെ പിൻചക്രങ്ങൾ കയറിയിറങ്ങുന്നതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.
കൊച്ചിയിൽ ബസ്സുകളുടെ മത്സരയോട്ടം; സ്വകാര്യബസ് ഇടിച്ച് ബൈക്ക് യാത്രികന് മരിച്ചു
