മരുമകളും ആണ്സുഹൃത്തും ചേർന്ന് നടുറോഡിൽ വച്ച് ഭർതൃപിതാവിനെ ജീവനോടെ തീകൊളുത്തി കൊന്നു. തമിഴ്നാട്ടിലെ കടലൂർ ജില്ലയിലാണ് സംഭവം. മലിഗംപട്ട് സ്വദേശിയായ രാജേന്ദ്രൻ എന്ന 64കാരനെയാണ് മരുമകളും കാമുകനും ചേർന്ന് പെട്രോൾ ഒഴിച്ച് തീ കൊളുത്തിക്കൊന്നത്.
കഴുത്തിലും ശരീരത്തിന് പുറകിലും അരയിലുമായി 70 ശതമാനത്തിലേറെ പൊള്ളലേറ്റതിനാല് ചികിത്സയ്ക്കിടെയാണ് രാജേന്ദ്രൻ മരണപ്പെട്ടത്. രാജേന്ദ്രന്റെ മരുമകളായ ബി ജയപ്രിയയേയും ആണ്സുഹൃത്ത് ഡി മണികണ്ഠനേയും പൊലീസ് അറസ്റ്റ് ചെയ്തു. പ്രതികള് തമ്മിലുള്ള ബന്ധം രാജേന്ദ്രൻ ചോദ്യം ചെയ്തിരുന്നു. ഇത് കുടുംബവഴക്കിന് കാരണമായി. ഇതിലുള്ള പകയാണ് കൊലപാതകത്തിന് കാരണമായതെന്ന് പൊലീസ് പറഞ്ഞു.