കേരളത്തില് പകല് താപനില ക്രമാതീതമായി ഉയരുന്ന സാഹചര്യത്തില് വെയിലത്ത് ജോലി ചെയ്യുന്ന തൊഴിലാളികളുടെ ജോലി സമയം മെയ് 10 വരെ പുനഃക്രമീകരിച്ചു. രാവിലെ ഏഴ് മുതല് വൈകുന്നേരം ഏഴ് വരെയുള്ള സമയത്തില് എട്ട് മണിക്കൂറായി ജോലി സമയം ക്രമപ്പെടുത്തിയിരിക്കുന്നത്. പകല് സമയം ജോലി ചെയ്യുന്ന എല്ലാ തൊഴിലാളികള്ക്കും ഉച്ചയ്ക്ക് 12 മുതല് വൈകുന്നേരം മൂന്ന് വരെ വിശ്രമവേളയായിരിക്കും.
ഷിഫ്റ്റ് വ്യവസ്ഥയില് ജോലി ചെയ്യുന്ന തൊഴിലാളികള്ക്ക് ഷിഫ്റ്റുകള് ഉച്ചയ്ക്ക് 12 മണിക്ക് അവസാനിക്കുന്ന തരത്തിലും വൈകുന്നേരം മൂന്ന് മണിക്ക് ആരംഭിക്കുന്ന തരത്തിലും പുനഃക്രമീകരിക്കേണ്ടതെന്ന് ലേബര് കമ്മീഷണര് സഫ്ന നസറുദ്ദീന് അറിയിച്ചു. ജില്ലാ ലേബര് ഓഫീസര്, ഡെപ്യൂട്ടി ലേബര് ഓഫീസര്, അസി. ലേബര് ഓഫീസര് എന്നിവരുടെ മേല്നോട്ടത്തില് പ്രത്യേക ടീമുകള് രൂപീകരിച്ചു ദൈനംദിന പരിശോധന നടത്തും. കണ്സ്ട്രക്ഷന്, റോഡ് നിര്മാണ മേഖലകള്ക്ക് പ്രത്യേക പരിഗണന നല്കി പരിശോധന ഉറപ്പാക്കുമെന്നും കമ്മീഷണര് അറിയിച്ചു. സമുദ്രനിരപ്പില് നിന്ന് 3,000 അടിയില് കൂടുതല് ഉയരമുള്ള സൂര്യാഘാതത്തിന് സാധ്യതയില്ലാത്ത മേഖലകളെ ഈ ഉത്തരവിന്റെ പരിധിയില് നിന്ന് ഒഴിവാക്കി.