മലയാള സിനിമയിലെ ആദ്യകാല തിരക്കഥാകൃത്തുക്കളിൽ ശ്രദ്ധേയനായ ശാരംഗപാണിയെക്കുറിച്ച് മകൾ ജൂലാ ശാരംഗപാണി എഴുതി സംസ്ഥാന ചലച്ചിത്ര അക്കാദമി പ്രസിദ്ധീകരിച്ച ശാരംഗപാണിനീയം എന്ന പുസ്തകം പി കെ മേദിനിക്ക് നൽകി പി പി ചിത്തരജ്ഞൻ എം എൽ എ പ്രകാശനം ചെയ്തു. നാലാമത് വനിത അന്താരാഷ്ട്ര ചലച്ചിത്ര മേളയുടെ ഉദ്ഘാടനച്ചടങ്ങിൽ കൈരളി തിയേറ്ററിലാണ് പുസ്കതം പ്രകാശനം ചെയ്തത്. ശാരംഗപാണി എന്ന കലാകാരന്റെ ജീവിതം അടയാളപ്പെടുത്താതെ പോകുമോ എന്ന ആശങ്കയിൽ നിന്നാണ് പുസ്തകത്തെക്കുറിച്ചുള്ള ചിന്ത മനസ്സിൽ വരുന്നതെന്ന് ജൂലാ ശാരംഗപാണി പറഞ്ഞു.
”മകളെന്ന നിലയിൽ ഏറ്റവും ധന്യമായ മുഹൂർത്തത്തിലൂടെയാണ് കടന്നുപോകുന്നത്. അച്ഛനെക്കുറിച്ചുള്ള പുസ്തകം പുറത്തിറങ്ങുന്നത് ജീവിത സാഫല്യമാണെ”ന്നും ജൂല പറഞ്ഞു.
1960‑ൽ പുറത്തിറങ്ങിയ ‘ഉമ്മ’ എന്ന ചിത്രം മുതൽ 1990‑ലെ കടത്തനാടൻ അമ്പാടി വരെ മൂന്നു പതിറ്റാണ്ട് കാലം സിനിമയിൽ സജീവമായിരുന്ന ശാരംഗപാണിയുടെ ജീവചരിത്രവും കേരളത്തിലെ ആദ്യകാല സിനിമാ സ്റ്റുഡിയോകളിലൊന്നായ ഉദയാ സ്റ്റുഡിയോയുടെ ചരിത്രവും പരസ്പരം ചേർന്നു കിടക്കുന്നവയാണ്. വടക്കൻപാട്ടുകളിൽ നിന്ന് സിനിമകൾക്കുള്ള സാധ്യതകൾ കണ്ടെത്തിയ ജനപ്രിയ തിരക്കഥാകൃത്തിന്റെ ജീവിതത്തിലെ പ്രധാന സംഭവങ്ങളുടെ ഫോട്ടോകളും പുസ്തകത്തിലുണ്ട്. സംവിധായകൻ ഫാസിൽ, വിപ്ലവ ഗായിക പി കെ മേദിനി, നടി കെപിഎസി ലളിത, കവി വയലാർ ശരത്ചന്ദ്ര വർമ തുടങ്ങിയവരുടെ ഓർമക്കുറിപ്പുകളും പുസ്തകത്തിലുണ്ട്.
You may also like this video
