സുഭദ്രം

എല്ലാം സുഭദ്രം
പുറത്ത് നിന്നു പൂട്ടി
തുറക്കുവാനൊരു
താക്കോലും കരുതി
പുറത്തേക്ക് പോകും നേരം
പറഞ്ഞു വച്ചു ഞാൻ
പ്രിയ ചങ്ങാതികളോട്
തൊടിയിലെ
മുക്കുറ്റി കാശിത്തുമ്പ
വാലാട്ടിപക്ഷി അണ്ണാറക്കണ്ണൻ
ചകോരം ഒറ്റമൈന
ഏവരും സാക്ഷി
അവർ കാക്കും
ഉറക്കത്തിലാഴ്ന്ന കൊച്ചുവീടിനെ
മുറിയ്ക്കുള്ളിലാരുമില്ലെന്ന
തോന്നൽ വേണ്ട
ഉണ്ട്,
പ്രിയപ്പെട്ടവർ അതിനുള്ളിൽ
ഉറക്കം കെടുത്തും ഒട്ടേറെ പേർ
പുറത്ത് നിന്ന് വരുംനേരം
കാൽപെരുമാറ്റമൊന്ന് കേട്ടാൽ മതി
കയറിയൊളിക്കും
പുസ്തകത്താളിൽ.
വർഷങ്ങളുടെ കനം
തീർത്ത് തീർത്ത് ഞാനിപ്പോൾ
ജന്മാന്തര പുണ്യം നേടുന്നത്
അവരിലൂടെ
പൂട്ടി പോകുന്നത്
ആധികൊണ്ട് തന്നെ
പുതിയവർക്കായ്
പണി തീർത്തയിടത്ത് നിന്ന്
കലഹപ്രിയർ ഓടി കയറും
പിന്നെ ചർച്ചയാകും
തെറ്റും ശരിയും ഏറ്റുമുട്ടും
സമാധാനം അതല്ലേ
തമ്മിൽ ഭേദം
സമാന്തരരേഖയിലൂടെയുള്ള യാത്ര
കഠിനം തന്നെ
എല്ലാം എന്റെ കയ്യിൽ സുഭദ്രം