കൊച്ചിയില്‍ മൂന്നുവയസുകാരനെ അതിക്രൂരമായി മര്‍ദ്ദിച്ച അധ്യാപികയെ അറസ്റ്റ് ചെയ്തു. കൊച്ചിയില്‍ മട്ടാഞ്ചേരിയിലാണ് സംഭവം. മട്ടാഞ്ചേരിയിൽ എൽകെജി വിദ്യാർത്ഥിയായ മൂന്നരവയസുകാരനെയാണ് അധ്യാപിക ക്രൂരമായി മർദിച്ചത്. പ്ലേ സ്കൂൾ അധ്യാപിക സീതാലക്ഷ്മിയെ മട്ടാഞ്ചേരി പോലീസ് അറസ്റ്റ് ചെയ്തു. ഇവരെ കോടതിയിൽ ഹാജരാക്കും. ചോദ്യങ്ങൾക്ക് മറുപടി പറയാത്തതിനെ തുടർന്ന് അധ്യാപിക കുഞ്ഞിനെ ചൂരൽ ഉപയോഗിച്ച് പുറത്ത് മർദിക്കുകയായിരുന്നുവെന്ന് കുട്ടിയുടെ മാതാപിതാക്കള്‍ നല്‍കിയ പരാതിയില്‍ പറയുന്നു.
മട്ടാഞ്ചേരി പാലസ് റോഡിലെ സ്മാർട്ട് കിഡ് എന്ന സ്ഥാപനത്തിൽ ഇന്നലെയാണ് സംഭവം. കുഞ്ഞിന്റെ പുറത്ത് ചൂരൽ കൊണ്ട് മർദനമേറ്റതിന്റെ പാടുകളുണ്ട്. സംഭവത്തിൽ അധ്യാപികയെ സസ്പെന്റ് ചെയ്തതായി സ്ഥാപനം അറിയിച്ചു. മാതാപിതാക്കളുടെ പരാതിയിൽ മട്ടാഞ്ചേരി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.