ചികിത്സക്കിടെ നാക്കിൽ ഡ്രില്ലർ തുളച്ചു കയറി. ആലത്തൂർ ഡെന്റൽ കെയർ ക്ലിനിക്കിനെതിരെ പരാതിയുമായി യുവതി രംഗത്ത്. പല്ലിന്റെ തുടർ ചികിത്സയുടെ ഭാഗമായി ഗം എടുക്കാൻ എത്തിയ ഗായത്രി സൂരജിന്റെ(21) നാക്കിലാണ് ഡ്രില്ലർ തുളച്ചു കയറിയത്. മുറിവ് വലുതായതോടെ യുവതി പാലക്കാട് ജില്ലാ ആശുപത്രിയിൽ ചികിത്സ തേടി.
മുറിവ് വലുതായെന്ന് അറിയിച്ചിട്ടും ചെറിയ മുറിവാണെന്ന് പറഞ്ഞ് ക്ലിനിക്കില് നിന്ന് വിടുകയായിരുന്നുവെന്ന് യുവതി ആരോപിച്ചു. സീനിയര് ഡോക്ടര്മാര് ഉണ്ടായിട്ടും നോക്കാന് തയാറായില്ലെന്നും യുവതി പറഞ്ഞു. മുറിവ് ഗുരുതരമാണെന്നും ശസ്ത്രക്രിയ വേണ്ടിവരുമെന്നും ജില്ലാ ആശുപത്രിയിലെ ഡോക്ടര്മാര് അറിയിച്ചിരിക്കുന്നത്. സംഭവത്തിൽ ക്ലിനിക്കിനെതിരെ പൊലീസ് കേസെടുത്തു. നിയമപരമായ കാര്യങ്ങൾ ഉള്ളതിനാൽ പ്രതികരിക്കാനില്ലെന്നാണ് സംഭവത്തില് ആലത്തൂർ ഡെന്റൽ കെയർ ക്ലിനിക്കിലെ ഡോക്ടറുടെ പ്രതികരണം.