ചേവായൂരില് ഡോക്ടറുടെ വീട് കുത്തിത്തുറന്ന് 45 പവനോളം സ്വര്ണാഭരണങ്ങള് കവര്ന്ന കേസില് പ്രതി പിടിയില്. ബംഗാള് സ്വദേശി താപസ്കുമാറിനെയാണ് പൊലീസ് പിടികൂടിയത്. കോഴിക്കോട് മെഡിക്കല് കോളേജിലെ അനസ്തേഷ്യ വിഭാഗം ഡോക്ടറായ ഗായത്രിയുടെ വീട്ടില് നിന്നാണ് 45 പവന് മോഷണം പോയത്. സെപ്തംബര് 28നായിരുന്നു കേസിനാസ്പദമായ സംഭവം.
സിസിടിവി ദൃശ്യങ്ങള് പ്രകാരം പുലര്ച്ചെ 1.55ഓടെയാണ് മോഷ്ടാവ് വീട്ടിലേക്ക് പ്രവേശിച്ചത്. വീടിന് മുന്വശത്തെ വാതില് കുത്തിതുറന്ന് അലമാരയിലും മേശയിലുമായി സൂക്ഷിച്ച സ്വര്ണം മോഷ്ടിക്കുകയായിരുന്നു. സ്വദേശമായ തിരുവനന്തപുരത്തേക്ക് പോയിരിക്കുകയായിരുന്നു ഗായത്രി. 28ന് വീട്ടില് തിരിച്ചെത്തിയപ്പോഴാണ് മോഷണവിവരം അറിയുന്നത്.