കൈ പിടിച്ച പങ്കായം
പ്രണയത്തിന്റെ നെഞ്ചിൽ കുത്തിയൊരു
തോണി യാത്ര
അങ്ങനെയാണ് തുടക്കം
ആദ്യമൊക്കെ ഇളങ്കാറ്റു പോലും
ആറിനെ കൊണ്ടുവന്ന്
ഇടതും വലതും തിക്കി
യാത്രയിലുരസും
ഓർമ്മകൾ വട്ടം വെച്ച്
തോണിയുലയും
പങ്കായത്തിൽ മുറുക്കിപ്പിടിച്ച്
കണ്ണും പൂട്ടി ആഞ്ഞുകുത്തും
ഇരുത്തം വന്നപ്പോൾ
തിരിഞ്ഞുനോക്കാൻ
ധൈര്യമായപ്പോൾ, കണ്ടു -
പുഴയുണ്ട് കൂടെ
എത്ര കുത്തിയിട്ടും
ഇത്രത്തോളമെത്തിക്കാൻ
ഒപ്പമുണ്ടായിരുന്നല്ലേയെന്ന്
അന്നേരമുള്ളൊന്നു നീറി