ലൈംഗിക കുറ്റവാളി ജെഫ്രി എപ്സ്റ്റീനുമായി ബന്ധപ്പെട്ട് നടത്തിയ പരാമര്ശത്തില് ഗ്രാമി പുരസ്കാര അവതാരകന് ട്രെവർ നോഹയ്ക്കെതിരെ നിയമനടപടി സ്വീകരിക്കുമെന്ന് യുഎസ് പ്രസിഡന്റ് ഡൊണാള്ഡ് ട്രംപ്. “വൈൽഡ് ഫ്ലവർ” എന്ന ഗാനത്തിന് ഗ്രാമി ഓഫ് ദ ഇയർ പുരസ്കാരം നേടിയ ബില്ലി എലിഷിനെ അഭിനന്ദിച്ച ശേഷം, ട്രംപിനെയും എപ്സ്റ്റീനെയും പരാമർശിച്ചിരുന്നു.
എല്ലാ കലാകാരന്മാരും ആഗ്രഹിക്കുന്ന ഗ്രാമി അവാർഡാണിത്, ട്രംപ് ഗ്രീൻലാൻഡിനെ ആഗ്രഹിക്കുന്നതുപോലെ തന്നെ. എപ്സ്റ്റീൻ പോയതിനാൽ, ബിൽ ക്ലിന്റണുമായി സമയം ചെലവഴിക്കാൻ അദ്ദേഹത്തിന് ഒരു പുതിയ ദ്വീപ് ആവശ്യമാണ് എന്നായിരുന്നു നോഹയുടെ പരാമര്ശം. ആറ് തവണ തുടര്ച്ചയായി ഗ്രാമി അവാർഡുകളുടെ അവതാരകനായിരുന്നു നോഹ. മുൻ വർഷങ്ങളിലും അദ്ദേഹം രാഷ്ട്രീയ പരാമര്ശങ്ങള് നടത്തിയിരുന്നു.
നോഹയ്ക്കെതിരെ കടുത്ത വിമര്ശനമാണ് ട്രംപ് ഉന്നയിച്ചത്. ഗ്രാമി അവാർഡുകൾ ഏറ്റവും മോശമായതും കാണാൻ കഴിയാത്തതുമാണ്. ഒരിക്കലും എപ്സ്റ്റീൻ ദ്വീപിലോ സമീപത്തോ പോയിട്ടില്ല, വ്യാജ വാർത്താ മാധ്യമങ്ങൾ പോലും ഞാന് അവിടെ പോയതായി ആരോപിച്ചിട്ടില്ല. നോഹ പൂര്ണമായും പരാജിതനായ മനുഷ്യനാണ്. കഴിവില്ലാത്ത, മയക്കുമരുന്ന് ഉപയോഗിക്കുന്ന അവതാരകനെതിരെ കേസെടുക്കാൻ അഭിഭാഷകര്ക്ക് നിര്ദേശം നല്കിയിട്ടുണ്ട്, ട്രംപ് ട്രൂത്ത് സോഷ്യലില് കുറിച്ചു.