ഉണരാൻ ഉണർവിന്റെ ശീലുകളായ് പടരാൻ
ഒളിമങ്ങാത്തോർമ്മകളിൽ നിറയുകയായ് ഭാസി
ഒരു വിപ്ലവ സ്വപ്നപ്രവാചകനായി
നവ കേരളപുലരിത്തിരി കത്തിച്ച പ്രതിഭേ,
ഒരു നാടകമീനാടിൻ തലവരകൾ മാറ്റി
നിങ്ങളീ നാടിനെ കമ്മ്യൂണിസ്റ്റാക്കി!
തിരയടിച്ചെത്തുന്നുണർത്തു പാട്ടായി
ബഹുമുഖപ്രതിഭതൻ പ്രഭയേറ്റും രൂപം
സ്വാതന്ത്ര്യ സമരത്തിൻ സമരഭടനായും
ജനമുന്നണിക്കുയിരേകിയ ജനനായകനായും
ഉശിരിൻ തിരുരൂപത്തിൽ തെളിയുന്നൊരു ചിത്രം
വെള്ളിത്തിരയിലും വെന്നിക്കൊടി നാട്ടി,
നാടകത്തമ്പുരാൻ കൈമാറിയ ദൗത്യം
മലനാട്ടിൻ തിലകക്കുറിയായ് കെപിഎസി
ചുടുചോരക്കെവിടേയും നിറമൊന്നെന്നോതി
ശരശയ്യയിലമരുന്ന നാട്ടാരെ ഉണർത്തി,
ഇമവെട്ടാതിടവേളകളില്ലാതെ നാടിൻ
ഉണർവ്വിന്നുയിരേകിയോരശ്വമേധങ്ങൾ!
ഒളിവിലും തെളിവിലും ആവേശം വിതറി
പെരുമകൾ പെരുകിപ്പല വഴികളിൽ പൊങ്ങി
ആ ദീപ്ത സ്മരണതൻ ചിറകേറി പുത്തൻ
പുലരിക്കതിർ നെഞ്ചേറ്റാൻ അണിചേരുക വീണ്ടും
(ഡിസംബർ എട്ട് തോപ്പിൽ ഭാസിയുടെ ഓര്‍മ്മദിനം)