ഓർമ്മകൾ മാഞ്ഞു പോയവർക്ക്

ഓർമ്മകൾ മാഞ്ഞു പോയവൾക്ക്
പ്രിയപ്പെട്ട
ഒരു പാട്ടിന്റെ ഈണത്തിൽ നിന്ന്
എപ്പോഴാണ്
നിശ്ചലതയുടെ കയത്തിലേക്ക്
നീ തെന്നിവീണത്?
ചിരിയും കരച്ചിലും മറന്നുപോയ
ചുണ്ടുകളിൽ നിന്ന്
വറ്റിപ്പോയ ചുംബനങ്ങളുടെ
ജലാശയത്തെ
തുഴഞ്ഞു പോകാൻ
ഇനി ആർക്കാണ് കഴിയുക?
മഞ്ഞുമൂടിയ ഓർമ്മയുടെ
ചില്ലതിരുകളിൽ നിന്ന്
മടങ്ങിപ്പോയ ദിവസങ്ങൾ
ഇരുട്ടിനെ വായിക്കുന്നത്
ഏതു കണ്ണട വച്ചാകും
പ്രിയപ്പെട്ടവളേ,
നിന്റെ ഓർമ്മകളുടെ
അവ്യക്ത നഗരത്തിൽ നിന്ന്
എന്നെ ഇറക്കിവിട്ടത്
ഏതു വാതിലിലൂടെയാണ്?