പാലക്കാട് തെരഞ്ഞെടുപ്പ് തോല്‍വിയെക്കുറിച്ച് എല്ലാം പാര്‍ട്ടി സംസ്ഥാന പ്രസിഡന്റ് കെ സുരേന്ദ്രനോട് ചോദിക്കണമെന്ന് മുൻ കേന്ദ്ര മന്ത്രിയും ബിജെപി നേതാവുമായ വി മുരളീധരന്. പാലക്കാടും വയനാടും ചേലക്കരയിലും തെരഞ്ഞെടുപ്പ് പ്രചാരണത്തിന് താന്‍ പോയി എന്നത് ശരിയാണ്. എന്നാല്‍ അതിനപ്പുറം വിശദാംശങ്ങള്‍ തനിക്കറിയില്ല. ഇവിടെ എന്തൊക്കെ പ്ലാന്‍ ചെയ്തു, എന്തൊക്കെ നടപ്പിലാക്കി, എന്തൊക്കെ നടപ്പിലായില്ല എന്നത് തനിക്ക് അറിയില്ല.
അതൊക്കെ പാര്‍ട്ടി വിലയിരുത്തും. ഈ തെരഞ്ഞെടുപ്പിൽ മഹാരാഷ്ട്രയുടെ ചുമതലയാണ് നോക്കിയത്. അതുകൊണ്ട് മഹാരാഷ്ട്രയെക്കുറിച്ച് നിങ്ങൾക്ക് അറിയാൻ താൽപ്പര്യമുണ്ടെങ്കിൽ ഞാൻ പറഞ്ഞുതരാമെന്നും അദ്ദേഹം പറഞ്ഞു. പാലക്കാട് ബിജെപി സ്ഥാനാർത്ഥിയായി സി കൃഷ്ണകുമാറിനെ പരിഗണിക്കുന്നതിൽ വി മുരളീധരന് എതിർപ്പുണ്ടായിരുന്നു . കെ സുരേന്ദ്രന്റെ പിടിവാശി മൂലമാണ് കൃഷ്ണകുമാർ സ്ഥാനാർത്ഥിയായി വന്നത് . ഇതിൽ പ്രതിഷേധിച്ച് വി മുരളീധരൻ പാലക്കാട് മണ്ഡലത്തിലെ പല പരിപാടികളിൽ നിന്നും വിട്ടുനിന്നിരുന്നു.