നിയമസഭാ തെരഞ്ഞെടുപ്പ് നടക്കാന്‍ ദിവസങ്ങള്‍ മാത്രം ശേഷിക്കേ ഹിമാചൽ പ്രദേശിലെ പ്രദേശ് കോൺഗ്രസ് കമ്മിറ്റിയുടെ മുൻ ജനറൽ സെക്രട്ടറി ധരംപാൽ താക്കൂർ ഖണ്ഡ് ഉൾപ്പെടെ സംസ്ഥാനത്തെ നിരവധി കോൺഗ്രസ് നേതാക്കളും അംഗങ്ങളും തിങ്കളാഴ്ച ബിജെപിയിൽ ചേർന്നു. കോൺഗ്രസ് പാർട്ടിയിലെ 26 നേതാക്കളാണ് രാജിവെച്ച് ഭരണകക്ഷിയായ ബിജെപിയിൽ ചേർന്നത്. വോട്ടെടുപ്പിന് ഒരാഴ്‌ചയിൽ താഴെ മാത്രം അവശേഷിക്കെ കോൺഗ്രസ് പാർട്ടിക്ക്‌ ഇത്‌ വൻ തിരിച്ചടിയാണ്‌. മുഖ്യമന്ത്രി ജയറാം താക്കൂറിന്റെയും ബിജെപി സംസ്ഥാന തെരഞ്ഞെടുപ്പ് ചുമതലയുള്ള ബിജെപിയുടെ സുധൻ സിംഗിന്റെയും സാന്നിധ്യത്തിലാണ് നേതാക്കൾ മറുകണ്ടം ചാടിയത്. ഷിംലയിലെ ബിജെപി സ്ഥാനാർത്ഥി സഞ്ജയ് സൂദും ചടങ്ങിൽ പങ്കെടുത്തു. ബിജെപിയിലെ എല്ലാ പ്രവർത്തകർക്കും മുഖ്യമന്ത്രി ജയറാം താക്കൂർ ഊഷ്മളമായ സ്വാഗതം അറിയിച്ചു. ബിജെപിയുടെ ചരിത്രവിജയത്തിനായി നമുക്ക് ഒരുമിച്ച് പ്രവർത്തിക്കാമെന്ന് നേതാക്കളെ സ്വാഗതം ചെയ്തുകൊണ്ട് അദ്ദേഹം പറഞ്ഞു. ഹിമാചലിൽ നവംബർ 12 നാണ് വോട്ടെടുപ്പ് നടക്കുക. വോട്ടെണ്ണൽ ഡിസംബർ എട്ടിന് നടക്കും.
English Summary: Big shift in Himachal Pradesh: 26 Congress leaders joined BJP
You may also like this video
