കേഡർ പാർട്ടിയാണെന്നാണ് പറഞ്ഞിരുന്നതെങ്കിലും ബിജെപി അലവലാതി പാർട്ടിയായി മാറിയെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. ബിജെപിയിൽ തെറ്റായ പ്രവണത വളരുകയാണെന്നും വെള്ളാപ്പള്ളി അഭിപ്രായപ്പെട്ടു. കണിച്ചുകുളങ്ങരയില്‍ മാധ്യമങ്ങളോട് സംസാരിക്കുന്നതിനിടെയായിരുന്നു വെള്ളാപ്പള്ളി നടേശന്റെ പരാമര്‍ശം.
മുസ്ലിം ലീഗ് എന്നുപറയുന്നത് മുസ്ലിംങ്ങളുടെ കൂട്ടായ്മയാണ്. ലീഗ് മതപരമായ കാര്യങ്ങൾ ചെയ്യുന്നതുകൊണ്ട് വർഗീയ പാർട്ടി തന്നെയാണ് . സംവരണ സീറ്റിൽ ഒഴികെ എല്ലായിടത്തും മുസ്ലിം സമുദായ അംഗങ്ങളെ മാത്രമാണ് ലീഗ് മത്സരിപ്പിക്കുന്നതെന്നും അദ്ദേഹം പറഞ്ഞു. ചേലക്കരയിലെ യുഡിഎഫ് സ്ഥാനാര്‍ത്ഥിയായിരുന്ന രമ്യ ഹരിദാസിന് രാഷ്ട്രീയനേതാവിന്റെ മേയ് വഴക്കമില്ല.
രമ്യയെ കുറിച്ച് കോൺഗ്രസുകാർക്കും അഭിപ്രായ വ്യത്യാസമുണ്ട്. അവർക്ക് അച്ചടക്കവും വിനയവും ഇല്ല. ബിജെപിയിൽ തെറ്റായ പ്രവണത വളർന്നുവരുന്നു. മുൻപ് ഇങ്ങനെ ഇല്ലായിരുന്നു. സുരേന്ദ്രന്റെ കപ്പാസിറ്റി എന്താണെന്ന് തനിക്കറിയില്ല. കെ സുരേന്ദ്രന്റെ പ്രാപ്തിയെ കുറിച്ച് പറയാന്‍ താന്‍ ആളല്ലെന്നും വെള്ളാപ്പള്ളി പറഞ്ഞു.