ഇരട്ടവോട്ട് വിവാദത്തിൽ പ്രതികരണവുമായി പാലക്കാട് ജില്ലാ കളക്ടർ എസ് ചിത്ര. വോട്ടിങ് യന്ത്രത്തിനൊപ്പം എഎസ്ഡി പട്ടികയും പോളിങ് ഉദ്യോഗസ്ഥർക്ക് വിതരണം ചെയ്യും. എഎസ്ഡി പട്ടികയിൽ തെരഞ്ഞെടുപ്പ് അട്ടിമറിക്കുമെന്ന് തോന്നിയ കുറച്ച് വ്യക്തികളുടെ പേര് ഉണ്ടെന്നും അവർ വോട്ട് ചെയ്യാൻ വരുമ്പോൾ കൃത്യമായ സത്യവാങ്മൂലം ഉണ്ടായിരിക്കണമെന്നും കളക്ടർ പറഞ്ഞു.
എന്തെങ്കിലും ക്രമക്കേട് ഉണ്ടായാൽ, അത് ചെയ്തവർക്കെതിരെ കർശന നടപടിയുണ്ടാകുമെന്നും കളക്ടർ മുന്നറിയിപ്പ് നൽകി. ആബ്സെന്റ് , ഷിഫ്റ്റ് , ഡെത്ത് എന്നിങ്ങനെയുള്ള പട്ടികയാണ് തെരഞ്ഞെടുപ്പ് കമ്മിഷൻ ക്രമക്കേട് തടയാനായി തയ്യാറാക്കിയത്. ഈ പട്ടിക പ്രിസൈഡിംഗ് ഓഫിസര്‍മാർക്ക് കൈമാറും. പട്ടികയിൽ ഉള്ളവർക്ക് വോട്ട് ചെയ്യാൻ പ്രത്യേക മാനദണ്ഡങ്ങൾ ഉണ്ടാകും. സത്യവാങ്മൂലം നൽകണമെന്നതാണ് അതിൽ ഏറ്റവും പ്രധാനം. തെറ്റായ സത്യവാങ് മൂലം നൽകിയാൽ ക്രിമിനൽ നടപടികൾ അടക്കം സ്വീകരിക്കുമെന്നും കളക്ടർ അറിയിച്ചു.