ഇലക്ഷന്‍ കമ്മിഷന്‍ നിയമനം നിഷ്പക്ഷ സ്വഭാവത്തിലാകണമെന്ന് സുപ്രീം കോടതി നിര്‍ദ്ദേശം. ചീഫ് ജസ്റ്റിസും പ്രധാനമന്ത്രിയും ലോക്‌സഭയിലെ പ്രതിപക്ഷനേതാവോ അല്ലെങ്കില്‍ ഏറ്റവും വലിയ പ്രതിപക്ഷ കക്ഷിയുടെ നേതാവോ അടങ്ങുന്ന കമ്മിറ്റിയുടെ ശുപാര്‍ശ മാനിച്ചാവണം രാഷ്ട്രപതി ഇലക്ഷന്‍ കമ്മിഷനെ നിയമിക്കേണ്ടതെന്ന് ഭരണഘടനാ ബെഞ്ച് ഉത്തരവിട്ടു. രാജ്യത്തിന്റെ വിവിധ കോണുകളില്‍ നിന്ന് തെരഞ്ഞെടുപ്പ് കമ്മിഷനെതിരെ വ്യാപകമായ പരാതികള്‍ ഉയര്‍ന്ന സാഹചര്യത്തില്‍ സുപ്രീം കോടതി വിധി ഏറെ പ്രസക്തമാണ്.
ജസ്റ്റിസ് കെ എം ജോസഫ് അധ്യക്ഷനും ജസ്റ്റിസുമാരായ അജയ് രസ്തോഗി, അനിരുദ്ധ ബോസ്, ഹൃഷികേശ് റോയ്, സി ടി രവികുമാർ എന്നിവര്‍ അംഗങ്ങളുമായ ഭരണഘടനാ ബെഞ്ച് അഭിപ്രായഭിന്നതകളൊന്നുമില്ലാതെയാണ് തെരഞ്ഞെടുപ്പ് കമ്മിഷന്‍ നിയമനത്തില്‍ നിഷ്പക്ഷത വേണമെന്ന ഒന്നിലേറെ ഹര്‍ജികളില്‍ വിധി പറഞ്ഞത്. നിരവധി രാഷ്ട്രീയ പാർട്ടികൾ അധികാരത്തിൽ വന്നെങ്കിലും അവയൊന്നും തിരഞ്ഞെടുപ്പ് കമ്മിഷനെ നിയമിക്കുന്നതിന് നിയമാനുസൃതമായ സംവിധാനം ഏര്‍പ്പെടുത്തിയിട്ടില്ലെന്ന് ബെഞ്ച് നിരീക്ഷിച്ചു. ഇത് നിയമത്തിലെ ഒരു ലംഘനമാണെന്നും ഭരണഘടനയുടെ ആർട്ടിക്കിൾ 324 പ്രകാരം നിയമനത്തിനായി ഒരു നിയമം പാര്‍ലമെന്റില്‍ ഉണ്ടാക്കുന്നത് ഒഴിവാക്കാനാകാത്ത ആവശ്യമാണെന്നും വിധിയില്‍ പറയുന്നു.
ന്യായമായും നിയമപരമായും പ്രവർത്തിക്കാനും ഭരണഘടനയുടെ വ്യവസ്ഥകളും കോടതിയുടെ നിർദ്ദേശങ്ങളും പാലിക്കാനും തിരഞ്ഞെടുപ്പ് കമ്മിഷൻ ബാധ്യസ്ഥരാണ്. ജനാധിപത്യം ജനങ്ങളുടെ അധികാരവുമായി അവ്യക്തമായി ബന്ധപ്പെട്ടിരിക്കുന്നു. സ്വതന്ത്രവും നീതിയുക്തവുമായ രീതിയിൽ ജനാധിപത്യം കൈവശം വച്ചാൽ ഒരു സാധാരണക്കാരന്റെ കൈകളിൽ സമാധാനപരമായ വിപ്ലവം സുഗമമാക്കുന്നു എന്നാണ് ബെഞ്ച് വിലയിരുത്തിയത്. എക്‌സിക്യൂട്ടീവിന്റെ എല്ലാ തരത്തിലുമുള്ള കീഴ്‌വഴക്കങ്ങളിൽ നിന്നും തെരഞ്ഞെടുപ്പ് കമ്മിഷൻ ‘അകന്ന്’ നിൽക്കണമെന്ന് കോടതി പറഞ്ഞു. സാമ്പത്തിക പിന്തുണ വെട്ടിക്കുറയ്ക്കുക എന്നതാണ് അതിന് ഇടപെടാൻ കഴിയുന്ന ഒരു മാർഗം. ദുർബലമായ ഒരു തെരഞ്ഞെടുപ്പ് കമ്മിഷൻ ഒരു വഞ്ചനാപരമായ സാഹചര്യത്തിലേക്ക് കാര്യങ്ങളെ നയിക്കും. അതിന്റെ കാര്യക്ഷമമായ പ്രവർത്തനത്തിൽ നിന്ന് വ്യതിചലിക്കുകയും ചെയ്യും. ജനങ്ങളുടെ ഇഷ്ടം പ്രതിഫലിപ്പിക്കുന്ന തരത്തിൽ തെരഞ്ഞെടുപ്പ് പ്രക്രിയയുടെ പരിശുദ്ധി കാത്തുസൂക്ഷിക്കുന്നതിനായി എല്ലാ പങ്കാളികളും അതിൽ പ്രവർത്തിച്ചാൽ മാത്രമേ ജനാധിപത്യം വിജയിക്കുകയുള്ളൂവെന്ന് ബെഞ്ച് പറഞ്ഞു.
English Sammury: Election Commissioners appointment advice to presidant by a Committee consisting of the Prime Minister, and leader of Opposition in the Lok Sabha and the Chief Justice of India