തദ്ദേശ തെരഞ്ഞെടുപ്പ് പ്രഖ്യാപിച്ച തീയതികളിൽ വോട്ടെടുപ്പ് നടത്താനാകാതെ മാറ്റിവച്ച മൂന്ന് വാർഡുകളിലെ തിരഞ്ഞെടുപ്പ് ജനുവരി 13ന് നടക്കും. നാളെയാണ് ഇത് സംബന്ധിച്ച ഔദ്യോഗിക വിജ്ഞാപനം പുറപ്പെടുവിക്കുക. സ്ഥാനാർത്ഥികൾ മരണപ്പെട്ടതിനെ തുടർന്ന് തെരഞ്ഞെടുപ്പ് മാറ്റിവച്ച തിരുവനന്തപുരം കോർപ്പറേഷനിലെ വിഴിഞ്ഞം വാർഡ്, മലപ്പുറം മൂത്തേടം ഗ്രാമപഞ്ചായത്തിലെ പായിമ്പാടം വാർഡ്, എറണാകുളം പാമ്പാക്കുട ഗ്രാമപഞ്ചായത്തിലെ ഓണക്കൂർ വാർഡ് എന്നിവിടങ്ങളിലാണ് പ്രത്യേക തെരഞ്ഞെടുപ്പ് നടക്കുക. ഡിസംബർ 24 വരെ ഈ വാർഡുകളിൽ നാമനിർദേശ പത്രിക സമർപ്പിക്കാം. വോട്ടെണ്ണൽ ജനുവരി 14നാണ്.
അതേസമയം, തദ്ദേശ സ്ഥാപനങ്ങളിലേക്കുള്ള അധ്യക്ഷൻ, ഉപാധ്യക്ഷൻ തെരഞ്ഞെടുപ്പ് ഡിസംബർ 26, 27 തീയതികളിൽ നടക്കും. നഗരസഭ, കോർപ്പറേഷൻ എന്നിവിടങ്ങളിലെ അധ്യക്ഷ തെരഞ്ഞെടുപ്പ് ഇരുപത്തിയാറിന് നടക്കും. അന്നേ ദിവസം ഉച്ചയ്ക്ക് 2.30ന് ഉപാധ്യക്ഷ പദവിയിലേക്കും തെരഞ്ഞെടുപ്പ് നടക്കും. ഗ്രാമ, ബ്ലോക്ക്, ജില്ലാ പഞ്ചായത്തുകളിലെ അധ്യക്ഷ തിരഞ്ഞെടുപ്പ് 27നാണ് നടക്കുക. അന്ന് ഉച്ചയ്ക്ക് ഉപാധ്യക്ഷ തെരഞ്ഞെടുപ്പും നടക്കും.