രാജ്യത്തെ സമസ്ത മേഖലകളും സ്വകാര്യവല്‍ക്കരിക്കാൻ തീരുമാനിച്ച് നീങ്ങുന്ന കേന്ദ്രസർക്കാരിനെതിരെ കൂടുതൽ സമരസജ്ജരാകണമെന്ന് വൈദ്യുതി ജീവനക്കാരുടെ ദേശീയ സംഘടനയായ ഓൾ ഇന്ത്യ ഫെഡറേഷൻ ഓഫ് ഇലക്ട്രിസിറ്റി എംപ്ലോയീസി(എഐഎഫ്ഇഇ)ന്റെ ജനറൽ സെക്രട്ടറി മോഹൻ ശർമ്മ.
വൈദ്യുതി രംഗത്തെയും സ്വകാര്യമേഖലയ്ക്ക് കൈമാറുന്നതിനാവശ്യമായ നിയമനിർമ്മാണത്തിനു നടപടികൾ കൈക്കൊള്ളുന്ന വർത്തമാനകാല സാഹചര്യത്തിന്റെ ഗൗരവം ഉൾക്കൊണ്ട് എല്ലാ വൈദ്യുതി ജീവനക്കാരും സമരരംഗത്തിറങ്ങണമെന്നും അദ്ദേഹം പറഞ്ഞു. സംഘടന രൂപീകരിച്ചതിന്റെ 60-ാം വാർഷികാഘോഷങ്ങളുടെ ഭാഗമായി തിരുവനന്തപുരത്ത് നടന്ന പരിപാടിയില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം.
നിർദ്ദിഷ്ട വൈദ്യുതി ഭേദഗതി ബിൽ പാസായാൽ സാധാരണ ഉപഭോക്താക്കളുടെ വൈദ്യുതി നിരക്ക് കുത്തനെ ഉയരും. 15 ലക്ഷത്തോളം വരുന്ന വൈദ്യുതി ജീവനക്കാരുടെ തൊഴിൽ സുരക്ഷ അപകടത്തിലാവുന്ന ഗുരുതര സ്ഥിതിവിശേഷവും ഉടലെടുക്കുമെന്നും മോഹന്‍ ശര്‍മ്മ കൂട്ടിച്ചേർത്തു.
വാര്‍ഷികാഘോഷ പരിപാടിയുടെ ഉദ്ഘാടനം സിപിഐ സംസ്ഥാന അസിസ്റ്റന്റ് സെക്രട്ടറി പി പി സുനീർ നിര്‍വഹിച്ചു. സ്വാതന്ത്ര്യാനന്തരം ഏഴ് പതിറ്റാണ്ടു കാലംകൊണ്ട് രാജ്യത്ത് പൊതുമേഖലാ സംരംഭങ്ങളിലൂടെ കെട്ടിപ്പടുത്ത ജനങ്ങളുടെ സ്വത്തുക്കളെല്ലാം നിസാര വിലയ്ക്ക് തങ്ങളുടെ ചങ്ങാതിമാരായ കുത്തക മുതലാളിമാർക്ക് അടിയറ വയ്ക്കുകയാണ് മോഡി സർക്കാർ ചെയ്യുന്നതെന്ന് സുനീർ പറഞ്ഞു.
മോഹൻ ശർമ്മയ്ക്കും മഹാരാഷ്ട്ര ഇലക്ട്രിസിറ്റി വർക്കേഴ്സ് ഫെഡറേഷൻ ജനറൽ സെക്രട്ടറി കൃഷ്ണ ഭോയർക്കും തൊഴിലാളികൾ സ്വീകരണം നൽകി. 1962ൽ മധ്യപ്രദേശിൽ രൂപീകരിച്ച വൈദ്യുതി ജീവനക്കാരുടെ ദേശീയ സംഘടനയായ എഐഎഫ്ഇഇ നിലവിൽ വൈദ്യുതിമേഖലയിലെ ദേശീയതലത്തിലെ ഏറ്റവും വലിയ സംഘടനയാണ്.
കേരള ഇലക്ട്രിസിറ്റി വർക്കേഴ്സ് ഫെഡറേഷൻ വർക്കിങ് പ്രസിഡന്റ് എ എം ഷിറാസ് അധ്യക്ഷത വഹിച്ചു. എഐഎഫ്ഇഇ ഡെപ്യൂട്ടി ജനറൽ സെക്രട്ടറി വി ജെ കുര്യാക്കോസ്, ഓഫീസേഴ്സ് ഫെഡറേഷൻ ജനറൽ സെക്രട്ടറി എം ജി അനന്തകൃഷ്ണൻ എന്നിവർ സംസാരിച്ചു. ഫെഡറേഷൻ ജനറൽ സെക്രട്ടറി എം പി ഗോപകുമാർ സ്വാഗതവും ട്രഷറർ ജേക്കബ് ലാസർ നന്ദിയും പറഞ്ഞു.
English Summary: Get ready to strike against central government policies: Mohan Sharma
You may also like this video
