കേരളത്തെ പുകയിലമുക്തമാക്കുകയാണ് ലക്ഷ്യമെന്ന് ആരോഗ്യമന്ത്രി വീണാ ജോര്ജ് പറഞ്ഞു. ആരോഗ്യ വകുപ്പിന്റെ ആരോഗ്യം ആനന്ദം ജനകീയ കാന്സര് കാമ്പയിന്റെ ഭാഗമായി കൂടി പ്രചരണം നടക്കുന്നുണ്ട്. ലോക പുകയിലവിരുദ്ധ ദിനം സംസ്ഥാനതല ഉദ്ഘാടനം ഓണ്ലൈനായി നിര്വഹിക്കുകയായിരുന്നു മന്ത്രി.
പുകയില വിരുദ്ധ ദിനാചരണത്തിന്റെ ഭാഗമായി ആരോഗ്യവകുപ്പ് വിപുലമായ പരിപാടികളാണ് ആവിഷ്കരിച്ചിരിക്കുന്നത്. വിദ്യാഭ്യാസ വകുപ്പുമായി സഹകരിച്ചുകൊണ്ട് വിദ്യാലയങ്ങള് കേന്ദ്രീകരിച്ച് ‘പുകയില രഹിതം ലഹരിമുക്തം എന്റെ വിദ്യാലയം’ എന്ന ആപ്തവാക്യത്തോടെ അവബോധം ശക്തിപ്പെടുത്തുന്നു. ശരീരത്തിന്റെ ആരോഗ്യവും മനസിന്റെ ആരോഗ്യവും മുന്നിര്ത്തി വളരെ ശക്തമായ പ്രവര്ത്തനങ്ങളാണ് നടത്തുന്നതെന്നും മന്ത്രി വ്യക്തമാക്കി.
ആരോഗ്യവകുപ്പ് ഡയറക്ടര് ഡോ. കെ ജെ റീന, അഡീഷണല് ഡയറക്ടര് ഡോ. കെ പി റീത്ത, ഡെപ്യൂട്ടി ഡയറക്ടര് ഡോ. ബിപിന് ഗോപാല്, ആര്സിസി അഡീഷണല് ഡയറക്ടര് ഡോ. സജീദ് എ തുടങ്ങിയവര് പങ്കെടുത്തു.