ബ്രാൻഡഡ് ഉല്പന്നങ്ങളുടെ മാതൃകയിൽ കടകളിൽ പായ്ക്ക് ചെയ്ത് വിൽക്കുന്ന അരിക്കും പയറുല്പന്നങ്ങൾക്കും അഞ്ച് ശതമാനം ജിഎസ്‌ടി വർധിപ്പിച്ച തീരുമാനം സംസ്ഥാനത്തെ പലചരക്ക്, ചെറുകിട കടകളിലും കുടുംബശ്രീ സ്ഥാപനങ്ങളിലും നടപ്പാക്കില്ലെന്ന് ധനമന്ത്രി കെ എൻ ബാലഗോപാൽ. ചെറിയ കടകളിലും കുടുബശ്രീക്കാർ നടത്തുന്ന സ്ഥാപനങ്ങളിലും പായ്ക്ക് ചെയ്ത് വിൽക്കുന്ന അരിക്കും പയറിനുമൊന്നും നികുതിവർധനയുണ്ടാകില്ല. ഇതനുസരിച്ച് നികുതിവകുപ്പിന് നിർദ്ദേശം നൽകിയിട്ടുണ്ട്. ഇക്കാര്യത്തില്‍ കേന്ദ്ര സര്‍ക്കാരുമായി എന്ത് പ്രശ്നങ്ങള്‍ ഉണ്ടായാലും അത് പരിഗണിക്കില്ലെന്ന് മന്ത്രി പറഞ്ഞു. സാധാരണക്കാര്‍ ആശ്രയിക്കുന്ന പലചരക്കു കടകളില്‍ നികുതി വര്‍ധിപ്പിച്ച് വില ഉയര്‍ത്തരുതെന്ന കാര്യത്തില്‍ സര്‍ക്കാരിന് നിര്‍ബന്ധമുണ്ടെന്ന് മന്ത്രി പറഞ്ഞു.
കേന്ദ്ര സര്‍ക്കാര്‍ ജിഎസ്‌ടി നിരക്ക് വർധിപ്പിച്ചതോടെ ചില വസ്തുക്കളുടെ വില ഉയർന്നിരുന്നു. ഇതുസംബന്ധിച്ച ആശയക്കുഴപ്പം നിലവിലുണ്ടെന്ന് ധനബില്ലുകളുടെ ചർച്ചയ്ക്കുള്ള മറുപടിയില്‍ മന്ത്രി വിശദീകരിച്ചു. അതേസമയം വൻകിട സൂപ്പർമാർക്കറ്റുകളിൽ കടകളുടെ പേര് അച്ചടിച്ച കവറുകളിൽ വില്പന നടത്തുന്നവയ്ക്ക് നികുതി ബാധകമായിരിക്കും. സാധാരണക്കാരെ ബാധിക്കുന്ന നികുതിവർധനയ്ക്ക് സംസ്ഥാനം എതിരാണ്. ഇക്കാര്യം ജിഎസ്‌ടി കൗൺസിലിനെ കത്തിലൂടെയും യോഗത്തിൽ നേരിട്ടും അറിയിച്ചിട്ടുണ്ട്. ആഡംബരസ്വഭാവമുള്ളവയ്ക്ക് നികുതി ഏർപ്പെടുത്തുന്നതിന് സംസ്ഥാനം എതിരല്ലെന്നും മന്ത്രി പറഞ്ഞു.
English Summary:GST will not be implemented on Grocery — Small — Kudumbashree establishments
You may also like this video
