കുണ്ടന്നൂരിൽ തോക്ക് ചൂണ്ടി 80 ലക്ഷം രൂപ കവർന്ന കേസിൽ രണ്ട് പേർ കൂടി അറസ്റ്റിലായി. എറണാകുളം ജില്ലാ കോടതിയിലെ അഭിഭാഷകനായ നിഖിൽ നരേന്ദ്രനും ഇയാളുടെ പെൺസുഹൃത്ത് ബുഷ്റയുമാണ് പൊലീസ് പിടിയിലായത്. ഇതോടെ കേസിൽ അറസ്റ്റിലായവരുടെ എണ്ണം അഞ്ചായി.
കവർച്ചയ്ക്ക് പിന്നിലെ മുഖ്യസൂത്രധാരണം നടത്തിയത് അഭിഭാഷകനായ നിഖിൽ നരേന്ദ്രനും ബുഷ്റയുമാണ് എന്ന് പൊലീസ് കണ്ടെത്തി. ‘പണമിരട്ടിപ്പ്’ വാഗ്ദാനം ചെയ്ത് ആസൂത്രണം ചെയ്ത കൊള്ളയാണിതെന്ന നിഗമനത്തിലാണ് അന്വേഷണസംഘം. ദിവസങ്ങളോളം നിരീക്ഷിച്ച ശേഷമാണ് ഇവർ പണം കവർന്നതെന്ന് പ്രതികൾ മൊഴി നൽകിയിട്ടുണ്ട്. മുഖംമൂടി ധരിച്ചെത്തി കവർച്ച നടത്തിയ മുഖ്യപ്രതി ജോജി സംസ്ഥാനം വിട്ടതായി പൊലീസ് അറിയിച്ചു. ഇയാളെ കണ്ടെത്താനായിട്ടില്ല. സംഭവത്തിൽ ഇതുവരെ 20 ലക്ഷം രൂപ പൊലീസ് കണ്ടെടുത്തിട്ടുണ്ട്. ഒന്നിൽ കൂടുതൽ പ്രതികൾ ഉൾപ്പെട്ടതിനാൽ, കവർന്ന പണം പലയിടങ്ങളിലായി സൂക്ഷിക്കാൻ സാധ്യതയുണ്ടെന്നും പൊലീസ് വിലയിരുത്തുന്നു.