2016ലെ അഴീക്കോട് നിയമസഭാ തെരഞ്ഞെടുപ്പുമായി ബന്ധപ്പെട്ട കെ എം ഷാജിയുടെ അയോഗ്യത കേസ് സുപ്രീംകോടതി ഇന്ന് പരിഗണിക്കും, കേസിലെ കെ എം ഷാജിയുടെ അപ്പീലും ഷാജിക്കെതിരെ എം വി നികേഷ് കുമാര് നല്കിയ ഹര്ജിയുമാണ് ജസ്റ്റീസ് ബി വി നാഗരത്ന അദ്ധ്യക്ഷയായ ബെഞ്ച് പരിഗണിക്കുക.
തെരഞ്ഞെടുപ്പ് ഹര്ജിയിലെ മറ്റ് ആവശ്യങ്ങള് അപ്രസക്തമായെങ്കിലും ഷാജിക്ക് ഹൈകോടതി വിധിച്ച അയോഗ്യത പ്രാബല്യത്തിലാക്കണമെന്നാണ് നികേഷ് കുമാറിന്റെ ആവശ്യം.കേസില് നേരത്തെ കേരള ഹൈക്കോടതി വിധിച്ച അയോഗ്യതയ്ക്ക് എതിരെ കെഎം ഷാജി നല്കിയ അപ്പീലില് സുപ്രീംകോടതി അനുകൂല ഉത്തരവ് പുറപ്പെടുവിച്ചിരുന്നു. ആറു വര്ഷത്തെ അയോഗ്യത വിധിച്ച ഹൈക്കോടതി ഉത്തരവ് സുപ്രീംകോടതി സ്റ്റേ ചെയ്തിരുന്നു.
എംഎല്എ ആയി തുടരാമെങ്കിലും വോട്ടിങ്ങിന് അനുവാദമില്ലെന്നത് ഉള്പ്പടെയുള്ള ഉപാധികളോടെയായിരുന്നു സ്റ്റേ. 2016ലെ തെരഞ്ഞെടുപ്പുമായി ബന്ധപ്പെട്ട് ഹൈക്കോടതി ഷാജിക്ക് വിധിച്ച അയോഗ്യത ഇപ്പോഴും നിലനില്ക്കുകയാണെന്ന് എം വി നികേഷ്കുമാറിനുവേണ്ടി ഹാജരായ മുതിര്ന്ന അഭിഭാഷകന് പി വി ദിനേശ് ചൂണ്ടിക്കാട്ടി. ഇതേതുടര്ന്ന്, അയോഗ്യതാവിഷയത്തില് വിശദമായ വാദംകേള്ക്കാമെന്ന് ജസ്റ്റിസ് ബി വി നാഗരത്ന, ജസ്റ്റിസ് ഉജ്വല്ഭുയാന് എന്നിവര് അംഗങ്ങളായ ബെഞ്ച് അറിയിക്കുകയായിരുന്നു.