സിപിഐ നേതാവും പുന്നപ്ര വയലാർ സമര സേനാനിയുമായിരുന്ന എം ടി ചന്ദ്രസേനന്റെ സ്മരണക്കായി ഏർപ്പെടുത്തിയ പുരസ്‌ക്കാരം കൃഷി മന്ത്രി പി പ്രസാദ് വിപ്ലവ ഗായിക പി കെ മേദിനിക്ക് സമ്മാനിച്ചു. എം ടി ചന്ദ്രസേനൻ സ്മാരക ട്രസ്റ്റ് ആണ് ചടങ്ങ് സംഘടിപ്പിച്ചത് . ഫലകവും 10, 001 രൂപയും അടങ്ങിയതാണ് പുരസ്‌ക്കാരം. ചടങ്ങിൽ സി അച്യുതമേനോൻ , എം ടി ചന്ദ്രസേനൻ എന്നിവരെ അനുസ്മരിച്ചു . രാഷ്ട്രീയ പ്രവർത്തനം ഏറെ ദുഷ്‌ക്കരമായ കാലത്ത് ജനങ്ങളുടെ മോചനത്തിനായി പൊരുതിയ നേതാക്കളായിരുന്നു അച്യുതമേനോനും , എം ടി ചന്ദ്രസേനനുമെന്ന് പരിപാടി ഉദ്‌ഘാടനം ചെയ്തുകൊണ്ട് പി പ്രസാദ് പറഞ്ഞു .
പുന്നപ്ര വയലാർ സമരത്തിന് നെടുനായകത്വം വഹിച്ച ചന്ദ്രസേനൻ തൊഴിലാളികളുടെ അവകാശങ്ങൾ സംരക്ഷിക്കാൻ മുന്നിൽ നിന്ന് പ്രവർത്തിച്ചു . സർ സിപിയുടെ നിറതോക്കുകൾക്ക് മുന്നിൽ വിരിമാറ് കാട്ടുവാൻ ജനതയെ പ്രേരിപ്പിച്ചത് അവരുടെ ജീവിതാനുഭവങ്ങൾ ആയിരിന്നു .പോരാട്ടങ്ങളിലൂടെ അല്ലാതെ തടവറയിൽ നിന്ന് മോചനം ഇല്ലെന്ന് അവർ തിരിച്ചറിഞ്ഞു. ആധുനിക കേരളം സൃഷ്ടിക്കുന്നതിൽ പ്രധാന പങ്ക് വഹിച്ച ഭരണാധികാരിയായിരുന്നു അച്യുതമേനോനെന്ന് അദ്ദേഹം അനുസ്മരിച്ചു .
രാസവളം ലഭ്യമല്ലാത്ത കാലത്ത് ജൈവ പച്ചക്കറി കൃഷിയിലൂടെ ആദ്യമായി ജനകീയ പദ്ധതി നടപ്പാക്കിയതും അച്യുതമേനോൻ ആയിരിന്നു എന്നും മന്ത്രി പറഞ്ഞു. സി അച്യുതമേനോൻ , എം ടി ചന്ദ്രസേനൻ അനുസ്മരണ പ്രഭാഷണം മുൻ മന്ത്രി പി തിലോത്തമൻ നടത്തി . ട്രസ്റ്റ് പ്രസിഡന്റ് എ ശിവരാജൻ അധ്യക്ഷനായി . സെക്രട്ടറി ടി ജെ ആഞ്ചലോസ് സ്വാഗതം പറഞ്ഞു . സിപിഐ ജില്ലാ അസിസ്റ്റന്റ് സെക്രട്ടറിമാരായ പി വി സത്യനേശൻ , ജി കൃഷ്ണപ്രസാദ്‌ , സംസ്ഥാന കൗൺസിൽ അംഗം ദീപ്തി അജയകുമാർ , ജില്ലാ എക്സിക്യൂട്ടീവ് അംഗങ്ങളായ പി ജ്യോതിസ് , വി മോഹൻദാസ് , മണ്ഡലം സെക്രട്ടറിമാരായ ഇ കെ ജയൻ, എസ് പ്രകാശൻ തുടങ്ങിയവർ പങ്കെടുത്തു .
You may also like this video:
