മൈസൂര്‍ നഗരവികസന അതോറിട്ടി (മുഡ) ഭൂമിയിടപാട് കേസില്‍ ചോദ്യം ചെയ്യലിന് ഹാജരാകാന്‍ മുഖ്യമന്ത്രി സിദ്ധരാമയ്യക്ക് നോട്ടീസ്. കേസ് പരിഗണിക്കുന്ന ലോകയുക്തയാണ് മുഖ്യമന്ത്രിക്ക് നോട്ടീസയച്ചത്. നാളെ ചോദ്യം ചെയ്യലിന് ഹാജരാകാനാണ് നിര്‍ദേശം. നേരത്തെ ലോകായുക്ത പൊലീസ് സിദ്ധരാമയ്യയുടെ ഭാര്യ ബി എം പാര്‍വതിയെ ചോദ്യം ചെയ്തിരുന്നു. കേസില്‍ ആദ്യമായാണ് സിദ്ധരാമയ്യയ്ക്ക് അന്വേഷണ സംഘം നോട്ടീസയച്ചിരിക്കുന്നത്.
മുഖ്യമന്ത്രിക്കെതിരെയുള്ള അഴിമതി കേസ് അന്വേഷിക്കാമെന്ന ഗവര്‍ണറുടെ ഉത്തരവ് ചോദ്യം ചെയ്ത് സിദ്ധരാമയ്യ സമര്‍പ്പിച്ച ഹര്‍ജി കോടതി നേരത്തെ തള്ളിയിരുന്നു. തുടര്‍ന്നാണ് ലോകായുക്ത നോട്ടീസയച്ചത്. ബി എം പാര്‍വതിയുടെ ഉടമസ്ഥതയിലുള്ള ഭൂമി കൈമാറ്റം നടത്തി കോടികള്‍ വിലയുള്ള 3.16 ഏക്കര്‍ ഭൂമി കൈവശപ്പെടുത്തിയെന്ന് കാട്ടി സമര്‍പ്പിച്ച കേസിനെത്തുടര്‍ന്നാണ് വിഷയത്തില്‍ അന്വേഷണം നടത്താന്‍ ലോകായുക്ത ഉത്തരവിട്ടത്.