ഏപ്രില്‍ ഒന്നു മുതല്‍ പുകയില ഉല്പന്നങ്ങളായ സിഗരറ്റ്, പാന്‍ മസാല എന്നിവയുടെ വില വര്‍ധിക്കും. വെള്ളിയാഴ്ച ലോക്‌സഭ പാസാക്കിയ 2023ലെ ധനകാര്യ ബില്ലിലെ ഭേദഗതികളുടെ ഭാഗമായാണ് വര്‍ധനവ് വരുന്നത്. ഭേദഗതി അനുസരിച്ച്‌, പാന്‍ മസാലയ്ക്കുള്ള പരമാവധി ജിഎസ്‌ടി നഷ്ടപരിഹാര സെസ് നിരക്ക്, ഒരു യൂണിറ്റിന് ഈടാക്കുക റീട്ടെയില്‍ വില്പന വിലയുടെ 51 ശതമാനം ആയിരിക്കും. ഇത് ഉല്പന്നത്തിന് ഈടാക്കുന്ന നിലവിലെ 135 ശതമാനം തീരുവയ്ക്ക് പകരമാണ്. ഏറ്റവും ഉയര്‍ന്ന നിരക്ക് ഇവയുടെ ചില്ലറ വില്പന വിലയുമായി സര്‍ക്കാര്‍ ബന്ധിപ്പിച്ചിരിക്കുകയാണ്.
അതേസമയം പുകയിലയുടെ നിരക്ക് ആയിരം സ്റ്റിക്കുകള്‍ക്ക് 4,170 രൂപയാക്കി. ഏറ്റവും ഉയര്‍ന്ന ജിഎസ്‌ടി നിരക്കായ 28 ശതമാനത്തിന് മുകളിലാണ് സെസ് ചുമത്തുന്നത്. മാര്‍ച്ച്‌ 24ന് ലോക്‌സഭ പാസാക്കിയ ധനകാര്യ ബില്ലിലെ 75 ഭേദഗതികളിലൊന്നിന്റെ അടിസ്ഥാനത്തിലാണ് പുകയില ഉല്പന്നങ്ങളുടെ പരിധി നിശ്ചയിച്ചിരിക്കുന്നത്.
English Sammury: Prices of cigarettes and pan masala will increase from April 1
