നെഹ്‌റു ട്രോഫി വള്ളംകളി മത്സരത്തിന് കാണികളില്‍ ആവേശം സൃഷ്ടിക്കാന്‍ ടൂറിസ്റ്റ് ബസുകള്‍ക്ക് സമാനമായി ചുണ്ടന്‍ വള്ളങ്ങളിലും ഗ്രാഫിക്‌സ് ആലേഖനം ചെയ്ത് തുടങ്ങി.സമീപ വര്‍ഷങ്ങളില്‍ വള്ളങ്ങള്‍ക്ക് വിവിധ നിറങ്ങള്‍ നല്‍കി മത്സരത്തിനെത്തിച്ചിരുന്നു.ഇത് വള്ളംകളി പ്രേമികള്‍ക്ക് ഇഷ്ടമാകുകയും സമൂഹ മാധ്യമങ്ങളില്‍ വലിയ പ്രചാരം നേടുകയും ചെയ്തതോടെയാണ് ഗ്രാഫിക്‌സും പരീക്ഷിക്കുന്നത്.
അപ്പര്‍കുട്ടനാട്,പായിപ്പാട്,മാന്നാര്‍ മഹാത്മാ ജലോതസവങ്ങളില്‍ പങ്കെടുക്കാനായി സൂര്യന്റെ ഗ്രാഫിക്‌സുമായാണ് ആയാപറമ്പ് വലിയ ദിവാന്‍ജി ചുണ്ടന്‍ കഴിഞ്ഞ ദിവസം നീരണഞ്ഞത്.വള്ളത്തിന്റെ ചിത്രങ്ങള്‍ സമൂഹ മാധ്യമങ്ങളില്‍ വലിയ തോതില്‍ പങ്കുവയ്ക്കപ്പെട്ടു.പ്രദേശത്തെ യുവാക്കളുടെ ആഗ്രഹപ്രകാരം അവര്‍ വരച്ച ഡിസൈനില്‍ ഗ്രാഫിക്‌സ് ചെയ്യുകയായിരുന്നുവെന്ന് വള്ളസമിതി പ്രസിഡന്റ് മോഹനന്‍ പറഞ്ഞു.