പൊതു സമൂഹത്തിന് ഉൾക്കൊള്ളാൻ കഴിയാത്ത തീരുമാനങ്ങൾ കാണുമ്പോൾ സഭയും, സമൂഹവും തുറന്നു പറയുമെന്ന് മലങ്കര ഓർത്തഡോക്സ് സഭ.കെപിസിസിയുടെ കാര്യങ്ങൾ സഭ തീരുമാനിക്കേണ്ടെന്ന കെപിസിസി പ്രസിഡന്റ് സണ്ണി ജോസഫിന്റെ വിമർശനത്തിന് പിന്നാലെയാണ് ഓർത്തഡോക്സ് സഭ വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ പ്രതികരണവുമായെത്തിയത്. ജനാധിപത്യത്തിന്റെ സൗന്ദര്യം കഴിവുള്ള നേതാക്കൻമാർ നേതൃത്വത്തിൽ വരുന്നതാണ്.
അവരെ മതത്തിന്റെയും താൽപ്പര്യങ്ങളുടെയും പേരിൽ തഴയപ്പെടുവാൻ പാടില്ലെന്നും അദ്ദേഹം പറഞ്ഞു. രാഷ്ട്രീയ പാർട്ടികളുടെ ആഭ്യന്തര കാര്യങ്ങളിൽ തീരുമാനമെടുക്കേണ്ടത് അവർതന്നെയാണ്. എടുക്കുന്ന തീരുമാനങ്ങളിൽ 100 ശതമാനം തൃപ്തിയുണ്ടാകുന്നില്ല എന്ന് സമ്മതിക്കേണ്ടി വരുന്നതും പാർടി നേതൃത്വത്തിന്റെ മാത്രം പ്രശ്നമാണെന്നും അദ്ദേഹം കൂട്ടിച്ചേർത്തു. മലങ്കര സഭയുടെ പിന്തുണ വേണ്ടെങ്കിൽ അക്കാര്യം നേതൃത്വം തുറന്നു പറയണം. സാമുദായിക സമവാക്യങ്ങളിലൂടെ കസേര കിട്ടിയവരുടെ മറുപടി ഇവിടെ പ്രസക്തവുമല്ലെന്നും അദ്ദേഹം പറഞ്ഞു.