ഭര്‍തൃപീഡനം സഹിക്കവയ്യാതെ യുവതി ആത്മഹത്യ ചെയ്ത സംഭവത്തില്‍ ഭര്‍ത്താവ് അറസ്റ്റിലായി. കുലശേഖരപുരം വില്ലേജില്‍ ആദിനാട് വടക്ക്മുറിയില്‍ ഗുരുപ്രീതിയില്‍ സുബിന്‍ (30) ആണ് അറസ്റ്റിലായത്. പുലിയൂര്‍ സ്വദേശിനിയായ ആതിരയും സുബിനും 2017ലാണ് വിവാഹിതരായത്. മയക്കുമരുന്നിനും കഞ്ചാവിനും അടിമയായ സുബിന്റെ നിരന്തരമായ മാനസീക ശാരീരിക പീഡനങ്ങള്‍ സഹിക്കവയ്യാതെയാണ് ആതിര ആത്മഹത്യ ചെയ്തത്. സംഭവത്തിനുപിന്നാലെ ആതിരയുടെ ആത്മഹത്യാ കുറിപ്പും പൊലീസ് കണ്ടെത്തി.
സുബിന്റെ നിരന്തര പീഢനം കാരണമാണ് ജീവിതം അവസാനിപ്പിക്കുന്നതെന്ന് ആതിര എഴുതിയ ആത്മഹത്യാകുറിപ്പില്‍ വ്യക്തമാക്കിയിരുന്നു. തുടര്‍ന്ന് സുബിനെ കസ്റ്റഡിയിലെടുത്ത് ചോദ്യം ചെയ്തതില്‍ ആതിരയുടെ ആത്മഹത്യക്ക് കാരണം സുബിന്റെ മാനസിക പീഢനമാണെന്ന് വ്യക്തമായതില്‍ സുബിനെ അറസ്റ്റ് ചെയ്യുകയായിരുന്നു. കരുനാഗപ്പള്ളി അസിസ്റ്റന്‍റ് പോലീസ് കമ്മീഷണര്‍ ഷൈനു തോമസിന്‍റെ നിര്‍ദേശപ്രകാരം കരുനാഗപ്പള്ളി പോലീസ് ഇന്‍സ്പെക്ടര്‍ ഗോപകുമാറിന്‍റെ നിര്‍ദേശപ്രകാരം എസ്.ഐമാരായ ജയശങ്കര്‍, റസല്‍ജോര്‍ജ്ജ് സി.പി.ഒ ഹാഷിം എന്നിവരടങ്ങിയ സംഘമാണ് ഇയാളെ അറസ്റ്റ് ചെയ്തത്. കോടതിയില്‍ ഹാജരാക്കിയ ഇയാളെ റിമാന്‍റ് ചെയ്തു.
English Summary: Youth Arrested in wife’s su-icide case in Kollam
