പ്രതിപക്ഷ നേതാവ് വി ഡി സതീശനോടുള്ള വിരോധം വ്യക്തിപരം മാത്രമെന്നും എൻഎസ്എസ് ഒരു പാർട്ടിക്കും എതിരല്ലെന്നും ജനറൽ സെക്രട്ടറി സുകുമാരൻ നായര്. സമുദായ അംഗങ്ങൾക്ക് ഇഷ്ടമുള്ളവർക്ക് വോട്ട് ചെയ്യാം. വി ഡി സതീശനുമായുള്ള കാര്യങ്ങൾ രാഷ്ട്രീയ നിലപാട് ആയി കാണേണ്ടതില്ലെന്നും അദ്ദേഹം പറഞ്ഞു. എസ്എന്ഡിപിയുമായി ഇനി ഐക്യം ഇല്ല. തുഷാര് വെള്ളാപ്പള്ളി പറഞ്ഞത് അദ്ദേഹത്തിന്റെ അഭിപ്രായമാണെന്നും സുകുമാരൻനായർ പറഞ്ഞു. വെള്ളാപ്പള്ളി നടേശന് പത്മ പ്രഖ്യാപിച്ചതില് തനിക്ക് ഒരു വിരോധവുമില്ല. പക്ഷെ അതിലെല്ലാം ഒരു രാഷ്ട്രീയമുണ്ട്.
എസ്എന്ഡിപി മുന്നോട്ട് വെച്ച ഐക്യം രാഷ്ട്രീയ ലക്ഷ്യമല്ല. അതിൽ ഉറച്ചു നിൽക്കുന്നുവെന്നും സുകുമാരൻ നായര് വാര്ത്താസമ്മേളനത്തില് പറഞ്ഞു. എൻഎസ്എസ്-എസ്എന്ഡിപി ഐക്യം ഉണ്ടാകുമെന്ന തുഷാർ വെള്ളാപ്പള്ളിയുടെ അഭിപ്രായ പ്രകടനത്തിന് പിന്നാലെ പ്രതികരിക്കുകയായിരുന്നു അദ്ദേഹം.
എൻഎസ്എസ്-എസ്എന്ഡിപി ഐക്യം ഉണ്ടാകുമെന്ന് ബിഡിജെഎസ് നേതാവ് തുഷാർ വെള്ളാപ്പള്ളി പറഞ്ഞിരുന്നു. സുകുമാരൻ നായരെ തള്ളിപ്പറയില്ലെന്ന് പറഞ്ഞ തുഷാർ, എൻഎസ്എസുമായി ചർച്ച നടത്തുനെന്നും പറഞ്ഞു. ചട്ടിയും കലവും ആകുമ്പോൾ തട്ടിയും മുട്ടിയും ഇരിക്കുമെന്നും എൻഎസ്എസ് വാതിൽ അടച്ചു എന്ന് എസ്എന്ഡിപി വിശ്വസിക്കുന്നില്ലെന്നും തുഷാർ കൂട്ടിച്ചേര്ത്തു.