കോവിഡ് അണുബാധ സ്ത്രീകളുടെ രക്തക്കുഴലുകളുടെ പ്രായം വർധിപ്പിക്കുമെന്ന് ഫ്രാൻസിലെ യൂണിവേഴ്സിറ്റി പാരിസ് സിറ്റി കണ്ടെത്തി. ശ്വാസതടസം, ക്ഷീണം തുടങ്ങിയ രോഗലക്ഷണങ്ങളുള്ള ലോങ് കോവിഡ് അഥവാ പോസ്റ്റ് കോവിഡ് സിൻഡ്രോം എന്ന രോഗാവസ്ഥയിലുള്ളവരിൽ നടത്തിയ പഠനത്തിലേതാണു കണ്ടെത്തൽ.
ഇതു പക്ഷാഘാതം, ഹൃദയാഘാതം എന്നിവയുൾപ്പെടെയുള്ള അസുഖങ്ങളുടെ സാധ്യത വർധിപ്പിക്കുന്നുവെന്നും യൂറോപ്യൻ ഹാർട്ട് ജേണലിൽ പ്രസിദ്ധീകരിച്ച പഠനത്തിലുണ്ട്. പുരുഷന്മാരെ അപേക്ഷിച്ച് സ്ത്രീകൾക്കു പ്രതിരോധശേഷി കൂടുതലാണ്. അതുകാരണം രക്തക്കുഴലിലേക്കു കടക്കാൻ ശ്രമിക്കുന്ന വൈറസിനെ ആദ്യഘട്ടത്തിൽ നശിപ്പിക്കുന്നു.
പിന്നീട് രക്തക്കുഴലുകളുടെ തകരാറിന് ഇതു കാരണമാകുന്നു. കോവിഡ് മുക്തി നേടിയവരിൽ വർഷങ്ങളോളം രോഗലക്ഷണങ്ങൾ തുടരുന്നതായും 16 രാജ്യങ്ങളിൽനിന്നുള്ള 2,400 ആളുകളിൽ നടത്തിയ പഠനത്തിൽ കണ്ടെത്തിയിട്ടുണ്ട്. ഇതിൽ ഭൂരിഭാഗവും സ്ത്രീകളായിരുന്നു.