യാത്രക്കാര്ക്ക് കൂടുതല് സൗകര്യങ്ങള് ഒരുക്കി തിരൂര് റെയില്വേ സ്റ്റേഷനില് ഡിജിറ്റല് ലഗേജ് ലോക്കര് സംവിധാനം ഏര്പ്പെടുത്തി. നിലവില് ലോക്കറുകള് സ്ഥാപിച്ചിട്ടുണ്ടെങ്കിലും സേവനം ഇതുവരെ പ്രവര്ത്തനം ആരംഭിച്ചിട്ടില്ല. എന്നാല് ഉടന് യാത്രക്കാര്ക്ക് ഈ സൗകര്യം ലഭ്യമാകുമെന്ന് റെയില്വേ അധികൃതര് അറിയിച്ചു. യാത്രക്കാര്ക്ക് സ്വന്തം സാമഗ്രികള് സുരക്ഷിതമായി സൂക്ഷിക്കാന് കഴിയുന്ന സ്വയം പ്രവര്ത്തിക്കുന്ന സംവിധാനമാണ് ഡിജിറ്റല് ലഗേജ് ലോക്കര്. മൊബൈല് ഫോണിലേക്ക് ലഭിക്കുന്ന ഒടിപി ഉപയോഗിച്ചാണ് ലോക്കര് തുറക്കാന് കഴിയുക. ഇതിലൂടെ യാത്രക്കാര്ക്ക് സ്റ്റേഷനില് എത്തുമ്പോള് ബാഗുകളും മറ്റ് സാധനങ്ങളും സുരക്ഷിതമായി സൂക്ഷിച്ച് മറ്റ് ആവശ്യങ്ങള്ക്കായി യാത്ര ചെയ്യാന് സൗകര്യം ലഭിക്കും.
ആറു മണിക്കൂറിന് 60 രൂപയെന്ന കണക്കാണ് ലോക്കര് ഉപയോഗിക്കുന്നതിന് ചാര്ജാക്കുന്നത്. 10 ബാഗുകള് വരെ ഉള്ക്കൊള്ളാന് കഴിയുന്ന വലിയ ലോക്കറിന് 24 മണിക്കൂറിന് 300 രൂപ ഈടാക്കും. വിവിധ നഗരങ്ങളിലേക്ക് യാത്ര ചെയ്യുന്ന വിനോദസഞ്ചാരികള്ക്കും തീര്ഥാടകര്ക്കും ബിസിനസ് ആവശ്യങ്ങള്ക്കായി യാത്ര ചെയ്യുന്നവര്ക്കും ഈ സംവിധാനം ഏറെ സഹായകരമാകുമെന്ന് റെയില്വേ അധികൃതര് അറിയിച്ചു.