മനുഷ്യമനസാക്ഷിയെ അമ്പരപ്പിച്ച സാമ്രാജ്യത്വ നീക്കത്തെ ഗൗരവത്തോടെ കാണുന്നതിന് പകരം നിസ്സാരവല്ക്കരിക്കാനും അമേരിക്കന് വിധേയത്വം പ്രകടിപ്പിക്കാനുള്ള ത്വരയാണ് കേന്ദ്രസര്ക്കാര് പ്രകടിപ്പിക്കുന്നതെന്ന് മുഖ്യമന്ത്രി പിണറായി വിജയന് വാര്ത്ത സമ്മേളനത്തില് പറഞ്ഞു. ഇത് സംബന്ധിച്ച വിദേശ മന്ത്രാലയത്തിന്റെ പ്രസ്താവനയില് അമേരിക്കയുടെ പേര് പോലും പരാമര്ശിക്കപ്പെട്ടില്ല. ഓരോ ദിവസവും ഇന്ത്യയെയും നമ്മുടെ പരമാധികാരത്തെയും അപമാനിക്കുന്ന പ്രസ്താവനകളാണ് ട്രംപ് നടത്തുന്നത്. എന്നാല് അമേരിക്കന് പ്രസിഡന്റിനെതിരെ ഒന്ന് പ്രതിഷേധിക്കാന് പോലും കേന്ദ്രസര്ക്കാരിന് സാധിക്കുന്നില്ല.
രാജ്യത്തെ മുഖ്യപ്രതിപക്ഷ കക്ഷി എന്ന് അവകാശപ്പെടുന്ന കോണ്ഗ്രസ്സും അതേ വഴിയിലാണ്. അമേരിക്കന് പ്രസിഡന്റ് ഡൊണാള്ഡ് ട്രംപ് ഇറക്കുമതി തീരുവ വീണ്ടും വീണ്ടും ഉയര്ത്തുമെന്ന് ഇന്ത്യയെ ഭീഷണിപ്പെടുത്തുമ്പോഴും, അതേ ട്രംപിന്റെ പേരില് ഒരു റോഡ് തന്നെ ഉണ്ടാക്കുവാനുള്ള മത്സരബുദ്ധി കാണിക്കുന്ന തെലങ്കാനയിലെ കോണ്ഗ്രസ് സര്ക്കാരിനെ നാം കണ്ടതാണ്. ഇതില് ആരും അത്ഭുതപ്പെടുന്നില്ല. അമേരിക്കയുടെ ഫണ്ടിങ്ങോടെ സി ഐ എ ആസൂത്രണംചെയ്ത വിമോചന സമരം എന്ന അട്ടിമറി സമരം നടത്തിയവര്ക്ക് അതേ ചെയ്യാനാവൂവെന്ന് മുഖ്യമന്ത്രി കൂട്ടിച്ചേർത്തു.