സര്വശിക്ഷാ കേരളം പദ്ധതി പ്രകാരം സംസ്ഥാനത്തിന് അര്ഹതപ്പെട്ട ഫണ്ട് നല്കാമെന്ന വാക്ക് കേന്ദ്രം പാലിച്ചില്ലെന്ന് കേരളം. സ്പെഷ്യല് എഡ്യൂക്കേറ്റര് നിയമനവുവുമായി ബന്ധപ്പെട്ട കേസിലാണ് കേരളം ഇക്കാര്യം സുപ്രീം കോടതിയെ അറിയിച്ചത്. പദ്ധതി പ്രകാരം കേരളത്തിന് അര്ഹതപ്പെട്ട പണം ഉടന് നല്കുമെന്ന് കേന്ദ്ര സര്ക്കാര് കഴിഞ്ഞ നവംബറില് സുപ്രീം കോടതിയെ അറിയിച്ചിരുന്നു. എന്നാല് ഈ വാഗ്ദാനം കേന്ദ്രം ഇനിയും പാലിച്ചിട്ടില്ലെന്ന് കേരളം കോടതിയെ അറിയിച്ചു. തുടര്ന്ന് ഇക്കാര്യം വ്യക്തമാക്കുന്ന സത്യവാങ്മൂലം സമര്പ്പിക്കാന് കോടതി സംസ്ഥാനത്തിന് നിര്ദേശം നല്കി.
തിങ്കളാഴ്ചവരെയാണ് സത്യവാങ്മൂലം സമര്പ്പിക്കാന് സമയം അനുവദിച്ചിരിക്കുന്നത്. ഫണ്ട് ലഭിക്കാത്തതാണ് നിയമനം വൈകാന് കാരണമെന്ന് സംസ്ഥാനം നേരത്തെ സുപ്രീം കോടതിയെ അറിയിച്ചിരുന്നു. പദ്ധതി പ്രകാരം കേരളത്തിന് ഫണ്ട് ലഭിച്ചെന്നാണ് കെഎസ്ടിഎ സുപ്രീം കോടതിയെ അറിയിച്ചത്. ഫണ്ട് ലഭിച്ചിട്ടും നിയമനം നടത്താത്തതിന്റെ കാരണം അന്വേഷിക്കണമെന്നും ഉദ്യോഗസ്ഥരില് നിന്നും വിശദീകരണം തേടണമെന്നും സംഘടന ആവശ്യപ്പെട്ടു. സര്ക്കാര് വിശദീകരണം ലഭിച്ച ശേഷം ഇക്കാര്യത്തില് തീരുമാനമെടുക്കാമെന്ന് ഹര്ജി പരിഗണിച്ച ജസ്റ്റിസുമാരായ ദീപാങ്കര് ദത്ത, കെ വി വിശ്വനാഥന് എന്നിവരുള്പ്പെട്ട ബെഞ്ച് വ്യക്തമാക്കി.