ഒമ്പതാം ക്ലാസുകാരിയെ വീട്ടിനുള്ളിൽ തൂങ്ങി മരിച്ച നിലയിൽ കണ്ടെത്തി. സംഭവത്തിൽ ദുരൂഹതയെന്ന് ബന്ധുക്കൾ. തൂങ്ങി മരണമാണ് പ്രാഥമീക നിഗമനമെങ്കിലും ശാസ്ത്രീയ പരിശോധനാ ഫലം വരുന്നതോടെ കൂടുതൽ അന്വേഷണം നടത്തുമെന്ന് പൊലീസ് പറഞ്ഞു.

വെങ്ങാനൂർ വെണ്ണിയൂർ നെല്ലിവിളാകത്ത് വീട്ടിൽ ഫോട്ടോഗ്രാഫറായ സുരേഷ് കുമാറിന്റെയും പ്രമീളയുടെയും ഏകമകൾ അലന്യ (കല്ലു, 15) യാണ് മരിച്ചത്. സംഭവ സമയത്ത് വീട്ടിൽ ആരുമില്ലായിരുന്നു. തിങ്കളാഴ്ച വൈകുന്നേരം നടന്ന സംഭവം രാത്രി ഒമ്പതോടെയാണ് പുറംലോകമറിഞ്ഞത്. അച്ഛനും അമ്മയും ഒരു ബന്ധുവിന്റെ മരണ വീട്ടിൽ പോയതിനാൽ കുട്ടിയെ അയൽവീട്ടിൽ നിർത്തിയിരുന്നു. വൈകിട്ട് ഏഴോടെ വീട്ടിൽ പോയി ഭക്ഷണം എടുത്തിട്ട് വരുമെന്ന് പറഞ്ഞാണ് അലന്യ സ്വന്തം വീട്ടിൽ പോയത്. ഏറെ നേരമായി കാണാത്തതിനെ തുടർന്ന് ബന്ധു തിരക്കി വന്നപ്പോഴാണ് പെൺകുട്ടിയെ തൂങ്ങിമരിച്ച നിലയിൽ കണ്ടത്. ഇവർ ബഹളം വച്ചതിനെ തുടർന്ന് നാട്ടുകാർ ഓടികൂടുകയും പൊലീസിൽ വിവരമറിയിക്കുകയും ചെയ്തു. സന്തോഷവതിയായി കണ്ട പെൺകുട്ടിയുടെ പെട്ടെന്നുള്ള മരണത്തിൽ ദുരൂഹതയുണ്ടെന്ന് ബന്ധുക്കളും നാട്ടുകാരും പറഞ്ഞു. വീടിനുള്ളിലെ ഹാളിൽ ഷീറ്റ് മേഞ്ഞ മേൽകൂരയിലെ ഇരുമ്പ് പൈപ്പിൽ ഷാളിൽ തൂങ്ങിയ നിലയിലാണ് മൃതദേഹം കണ്ടത്.

കാൽമുട്ടുകൾ തറയിൽ തട്ടിയ നിലയിലായിരുന്നു. വെങ്ങാനൂർ ഗേൾസ് ഹയർ സെക്കൻഡറി സ്കൂളിലെ ഒമ്പതാം ക്ലാസ് വിദ്യാർത്ഥിനിയായിരുന്നു. ഫോറൻസിക് വിഭാഗം എത്തിയ ശേഷം ഇന്നലെ രാവിലെ ഇൻക്വസ്റ്റ് നടപടികൾ പൂർത്തിയാക്കി. തുടർന്ന് മെഡിക്കൽ കോളജിൽ നടത്തിയ പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടു നൽകി. വിഴിഞ്ഞം പൊലീസ് കേസെടുത്തു.

English Summary: Student hanged inside her house; Mysterious relatives