ഏഴുവർഷം കൊണ്ട് മൂന്നുലക്ഷം പേരെ ഭൂമിയുടെ അവകാശികളാക്കി: മന്ത്രി കെ രാജൻ

ഏഴുവർഷം കൊണ്ട്  മൂന്നുലക്ഷം കുടുംബങ്ങളെ സംസ്ഥാന സർക്കാർ ഭൂമിയുടെ അവകാശികളാക്കിയെന്നു മന്ത്രി കെ രാജൻ. കൈവശാവകാശത്തിനു കേവലം പട്ടയം നൽകുക മാത്രമല്ല, ആദിവാസി പ്രാക്തന ഗോത്രങ്ങളടക്കം അര്‍ഹരായ മുഴുവൻ പേരെയും ഭൂമിയുടെ അവകാശികളാക്കുകയാണ് സർക്കാരിന്റെ ലക്ഷ്യമെന്നും മന്ത്രി പറഞ്ഞു. അർഹരായ മുഴുവൻ ഭൂരഹിതർക്കും സമയബന്ധിതമായി പട്ടയം നൽകുന്നതിനുള്ള സംസ്ഥാന സർക്കാരിന്റെ പ്രത്യേക ദൗത്യമായ പട്ടയമിഷന്റെ സംസ്ഥാനതല ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

പട്ടയവിതരണത്തിലെ കാലതാമസം ഒഴിവാക്കാനാണ് പട്ടയമിഷൻ. സംസ്ഥാനത്തെ പാവപ്പെട്ടവന് തലചായ്ക്കാൻ ആവശ്യമായ ഭൂമി നൽകാൻ ചട്ടങ്ങളിലും നിയമങ്ങളിലും ഉണ്ടാകുന്ന സാങ്കേതിക പ്രശ്നങ്ങൾ മറികടക്കാനുള്ള  പരിശ്രമമാണ് നടത്തുന്നത്. സാങ്കേതികമായ തകരാറുകൊണ്ട് ഒരുതുണ്ട് ഭൂമിക്ക് അർഹതയില്ലാതെ വരുന്ന അവസ്ഥ ഒഴിവാക്കുമെന്നും അദ്ദേഹം ചൂണ്ടിക്കാട്ടി.

മാമ്മൻ മാപ്പിള ഹാളിൽ നടന്ന ചടങ്ങിൽ ജില്ലയിൽ 256 പട്ടയങ്ങൾ വിതരണം ചെയ്യുന്നതിന്റെ ഉദ്ഘാടനവും ജില്ലയിലെ മുഴുവൻ റവന്യൂ ഓഫീസുകളിലും ഇ‑ഓഫീസ് നടപ്പാക്കിയതിന്റെ ഔദ്യോഗിക പ്രഖ്യാപനവും മന്ത്രി നിർവഹിച്ചു. അയർക്കുന്നം സ്വദേശി കെ അനിൽകുമാർ ആദ്യപട്ടയം ഏറ്റുവാങ്ങി.

മന്ത്രി വി എൻ വാസവൻ ഓൺലൈനായി അധ്യക്ഷത വഹിച്ചു. സർക്കാർ ചീഫ് വിപ്പ് ഡോ. എൻ ജയരാജ്, എംഎൽഎ മാരായ സി കെ ആശ, ജോബ് മൈക്കിൾ, ജില്ലാ പഞ്ചായത്ത് പ്രസിഡന്റ് കെ വി ബിന്ദു, കോട്ടയം നഗരസഭാധ്യക്ഷ ബിൻസി സെബാസ്റ്റ്യൻ, അസിസ്റ്റന്റ് കമ്മിഷണർ അനു എസ് നായർ, രാഷ്ട്രീയ പാർട്ടി പ്രതിനിധികളായ വി ബി ബിനു, രാജീവ് നെല്ലിക്കുന്നേൽ തുടങ്ങിയവർ പ്രസംഗിച്ചു.