കാലാവസ്ഥാ വ്യതിയാനം രാജ്യത്തുടനീളം മഴയും ശരാശരി താപനിലയും വര്ധിക്കാന് ഇടയാക്കുന്നുവെന്ന് ഇന്ത്യന് കാലാവസ്ഥാ വകുപ്പ് (ഐഎംഡി). ഈ വര്ഷം തെക്കുപടിഞ്ഞാറന് മണ്സൂണില് സാധാരണയിലും കൂടുതല് മഴ ലഭിച്ചതായാണ് കണക്കുകള്. ജൂണ് ഒന്നു മുതല് സെപ്റ്റംബര് 30വരെ രാജ്യത്ത് 934.8 മില്ലിമീറ്റര് മഴയാണ് പെയ്തിറങ്ങിയത്. സാധാരണ ഈ കാലയളവില് 868.6 മില്ലിമീറ്റര് മഴയാണ് ലഭിക്കാറുണ്ടായിരുന്നത്. കാലാവസ്ഥാ വ്യതിയാനം വിവിധ സംസ്ഥാനങ്ങളില് കനത്ത വെള്ളപ്പൊക്കത്തിനും പ്രകൃതി ദുരന്തങ്ങള്ക്കും കാരണമായി. ഇത് രാജ്യത്ത് വന് നാശനഷ്ടമാണ് സൃഷ്ടിച്ചത്.
പരിസ്ഥിതി സംഘടനയായ ക്ലൈമറ്റ് ട്രെന്ഡ്സ് നടത്തിയ പഠനത്തില് രാജ്യത്തെ 729 ജില്ലകളില് 340 എണ്ണത്തില് സാധാരണ മഴയും 158 ജില്ലകളില് സാധാരണയില് കവിഞ്ഞ മഴയും ലഭിച്ചതായി പറയുന്നു. 48 ജില്ലകളില് പ്രളയഭീകരത നേരിട്ടു. എന്നാല് 208 ജില്ലകളില് കാര്യമായ മഴ ലഭിച്ചില്ല.
കഴിഞ്ഞ അഞ്ചുവര്ഷത്തിനിടെ ഏറ്റവും കൂടുതല് മഴക്കെടുതി റിപ്പോര്ട്ട് ചെയ്തത് ഈ വര്ഷമാണ്. 2020 ന് ശേഷം ഇക്കഴിഞ്ഞ ഓഗസ്റ്റില് 753 സ്ഥലങ്ങളില് റെക്കോഡ് മഴ റിപ്പോര്ട്ട് ചെയ്തതായി പഠനം ചൂണ്ടിക്കാട്ടുന്നു. കനത്ത മഴ ലഭിക്കുന്നുണ്ടെങ്കിലും ആഗോളതാപനത്തിന്റെ ഫലമായി അന്തരീക്ഷത്തിലെ ശരാശരി താപനില ഉയരുകയാണ്. കാലാവസ്ഥാ വ്യതിയാനത്തിന്റെ ഫലമായാണ് കഴിഞ്ഞ വര്ഷം കൊടിയ വരള്ച്ചയും ഈ വര്ഷം കനത്ത മഴയും ഉണ്ടാകാന് കാരണമായതെന്ന് ക്ലൈമറ്റ് ട്രെന്ഡ്സ് സ്ഥാപക ആരത് കോസ്ല പറഞ്ഞു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.