ഐഎസ്എല്ലില്‍ കേരള ബ്ലാസ്റ്റേഴ്സിന് വീണ്ടും തോല്‍വി. രണ്ടിനെതിരെ നാല് ഗോളുകള്‍ക്ക് ബംഗളൂരു എഫ്‌സിയാണ് ബ്ലാസ്റ്റേഴ്സിനെ തോല്പിച്ചത്. സുനില്‍ ഛേത്രിയുടെ ഹാട്രിക്കാണ് ബംഗളൂരുവിന് തകര്‍പ്പന്‍ ജയം സമ്മാനിച്ചത്. എട്ടാം മിനിറ്റില്‍ സുനില്‍ ഛേത്രിയിലൂടെ ബംഗളൂരുവാണ് ആദ്യം മുന്നിലെത്തിയത്. 38-ാം മിനിറ്റില്‍ റയാന്‍ വില്യംസ് ബംഗളൂരുവിന്റെ ലീഡ് ഇരട്ടിയാക്കി. ഇതോടെ ആദ്യപകുതിയില്‍ ആതിഥേയര്‍ ആധിപത്യം സ്ഥാപിച്ചു.
രണ്ടാം പകുതിയുടെ 56-ാം മിനിറ്റില്‍ ജീസസ് ജിമെനെസ് ബ്ലാസ്റ്റേഴ്സിനായി ഒരു ഗോള്‍ മടക്കി. 67-ാം മിനിറ്റില്‍ ഫ്രെഡി ലല്ലമാവ്മ ബ്ലാസ്റ്റേഴ്സിന് സമനില ഗോള്‍ സമ്മാനിച്ചതോടെ പ്രതീക്ഷയും കൈവന്നു. എന്നാല്‍ സ്വന്തം തട്ടകത്തില്‍ സമനിലയിലൊതുങ്ങാന്‍ ബംഗളൂരു തയ്യാറല്ലായിരുന്നു. എന്നാല്‍ 73-ാം മിനിറ്റിലും ഇഞ്ചുറി സമയത്തും ഛേത്രി ഗോളുകള്‍ നേടിയതോടെ ബംഗളൂരു വിജയമുറപ്പിക്കുകയായിരുന്നു. ലീഗില്‍ 23 പോയിന്റോടെ ബംഗളൂരു തലപ്പത്തെത്തി. 11 പോയിന്റുള്ള ബ്ലാസ്റ്റേഴ്സ് 10-ാമതാണ്. മറ്റൊരു മത്സരത്തില്‍ ചെന്നൈയിന്‍ എഫ്‌സിക്കെതിരെ ഈസ്റ്റ് ബംഗാളിന് ഏകപക്ഷീയമായ രണ്ട് ഗോള്‍ വിജയം. 54-ാം മിനിറ്റില്‍ മലയാളി താരം വിഷ്ണു പുതിയ വളപ്പിലും 84-ാം മിനിറ്റില്‍ ജെക്സണ്‍ സിങ്ങുമാണ് ഗോളുകള്‍ നേടിയത്. ഒമ്പത് മത്സരങ്ങളില്‍ ഏഴ് പോയിന്റുമായി 11-ാമതാണ് ഈസ്റ്റ് ബംഗാള്‍. 12 പോയിന്റുമായി ചെന്നൈയിന്‍ ഒമ്പതാം സ്ഥാനത്താണ്.
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.