ചില ജീവാത്മാക്കൾ ഇടയ്ക്കൊക്കെ കണ്ടുമുട്ടുമ്പോൾ

ചില നേരങ്ങളിൽ
ചില കാലങ്ങൾക്കിപ്പുറവും
ഒരു നോക്കു കാണാൻ കൊതിച്ച്
നമ്മളിരുവരും പാതയോരത്ത്
കണ്ണ് നട്ടിരിക്കാറുണ്ട്
ഇമയനങ്ങാത്ത
കണ്ണുകൾക്കു മുന്നിൽ
രാപ്പൂക്കൾ മടിച്ചു മടിച്ച്
കൊഴിഞ്ഞു വീഴാറുണ്ട്
ചില നേരങ്ങളിൽ
ചില ഇടവഴികളിൽ വച്ച്
നാം തമ്മിൽ കണ്ടുമുട്ടാറുണ്ട്
അപ്പോഴൊക്കെ ആർത്തിപൂണ്ട്
നീ എന്നെയും ഞാൻ നിന്നെയും
തിന്നു തീർക്കാറുണ്ട്ൻ്റെ
ചില നേരങ്ങളിൽ
ചില ഭൂപടങ്ങളിൽ
നമ്മൾ ഒരൊറ്റ ബിന്ദുവിൽ
ഒരേ കനവുകളിൽ
വീണുറങ്ങാറുണ്ട്
ചിലവഴിയിറക്കങ്ങളിലും
കയറ്റങ്ങളിലും
നമ്മൾ ഇരുവരും
മൂക്കുകുത്തി വീഴാറുണ്ട്
ചില വഴിക്കടങ്ങൾ
നമ്മൾ പകുത്ത്
വീട്ടിത്തീർക്കാറുണ്ട്
ചില നേരങ്ങളിൽ
ചില ഇലയനക്കങ്ങൾ പോലും
നമ്മുടെ സ്വൈര്യത്തെ
തകർക്കാറുണ്ട്
ചില നേരപ്പകർച്ചകളിൽ
സ്നേഹഭംഗത്തിന്റെ
ഇടർച്ചകളിൽ നാം
തട്ടി വീണുടയാറുണ്ട്
ചില കാഴ്ചകളിൽ നടുങ്ങി
നമുക്ക് നാം അന്യരാവാറുണ്ട്
ചില ദേശകാലങ്ങളുടെ
അതിർവരമ്പുകളിൽ
പിന്നെയും
എപ്പൊഴൊക്കെയോ
നമ്മൾ കണ്ടുമുട്ടാറുണ്ട്
മുറുക്കിത്തുപ്പി
വെടി പറഞ്ഞിരുന്ന്
പഴയ കഥകൾ അയവിറക്കി
കാലം കഴിച്ച്
പോവാറുണ്ട്