കേരളം വിജ്ഞാന മികവിന്റെ ആഗോള ഹബാകുന്നു

ഉന്നത വിദ്യാഭ്യാസ രംഗത്ത് മികവിന്റെ കേന്ദ്രങ്ങൾ (സെന്റേഴ്‌സ് ഓഫ് എക്‌സലൻസ്) സ്ഥാപിച്ചുകൊണ്ട് അക്കാദമിക്, ഗവേഷണ മേഖലകളിൽ ആഗോള തലത്തിൽ തന്നെ സാന്നിധ്യമുറപ്പിച്ച് കേരളം. കേരള സംസ്ഥാന ഉന്നത വിദ്യാഭ്യാസ കൗൺസിലിന്റെ (കെഎസ്എച്ച്ഇസി) മേൽനോട്ടത്തിൽ പത്ത് പുതിയ മികവിന്റെ കേന്ദ്രങ്ങളാണ് വിപുലമായ അക്കാദമിക്, ഗവേഷണ പ്രവർത്തനങ്ങളിലേക്കു കടക്കുന്നത്. ഗവേഷണം, നൂതന പഠനരീതികൾ, ഭാഷാവികസനം, ലിംഗസമത്വം, തദ്ദേശീയ ജനവിഭാഗങ്ങൾ തുടങ്ങിയ വിവിധ മേഖലകളിൽ ശ്രദ്ധ കേന്ദ്രീകരിക്കുന്ന ഇവ കേരളത്തെ ആഗോള പഠന ഹബാക്കി മാറ്റുന്നതിനുള്ള സർക്കാർ കുതിപ്പിന്റെ പ്രധാന ഘടകങ്ങളാകും.Kerala is a glob­al hub of knowl­edge excellence

മികവിന്റെ കേന്ദ്രങ്ങളിൽ ആദ്യത്തേത് സെന്റർ ഓഫ് എക്‌സലൻസ് ഫോർ ടീച്ചിങ്, ലേണിങ് ആന്റ് ട്രെയിനിങ്ങാണ്. അധ്യാപക-അനധ്യാപക പരിശീലനം, പാഠ്യപദ്ധതി രൂപകല്പന, ടെക്‌നോളജി അധിഷ്ഠിത ബോധനം എന്നിവയിൽ ഊന്നൽ നൽകും. ഉന്നതവിദ്യാഭ്യാസ മേഖലയിൽ നയരൂപീകരണത്തിന് സഹായമുറപ്പാക്കുന്ന ഈ കേന്ദ്രത്തിന്റെ ആസ്ഥാനം തിരുവനന്തപുരത്തെ കേരള സംസ്ഥാന ഉന്നതവിദ്യാഭ്യാസ കൗൺസിലാണ്. കേരള ഇൻസ്റ്റിറ്റ്യൂട്ട് ഫോർ സയൻസ്, ടെക്‌നോളജി ആന്റ് ഇന്നൊവേഷൻ (കെഐഎസ്‌ടിഐ) ശാസ്ത്ര ഗവേഷണം, ട്രാൻസ്ലേഷണൽ ഗവേഷണം തുടങ്ങിയ മേഖലകളിൽ പ്രതിഭകളെ കണ്ടെത്തി അവരുടെ സേവനം പ്രയോജനപ്പെടുത്തുന്ന പദ്ധതികൾ നടപ്പിലാക്കും. എംജി സർവകലാശാലയാണ് ആസ്ഥാനം. കേരളത്തിന്റെ ചരിത്രം, സമൂഹം, സംസ്‌കാരം എന്നിവയിൽ ഗവേഷണത്തിന് പ്രാധാന്യം നൽകുന്നതാണ് മൂന്നാര്‍ ആസ്ഥാനമാക്കിയ കേരള ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡീസ് (കെഐഎഎസ്). കേരള നെറ്റ്‌വർക്ക്‌ ഫോർ റിസർച്ച്-സപ്പോർട്ട് ഇൻ ഹയർ എഡ്യൂക്കേഷൻ (കെഎൻആര്‍എസ്എച്ച്ഇ) ഗവേഷണ ശൃംഖലയും ഉപകരണ പങ്കുവയ്പ്പും പ്രോത്സാഹിപ്പിക്കും. 

കേരള ഇൻസ്റ്റിറ്റ്യൂട്ട് ഫോർ ജെൻഡർ ഇക്വാളിറ്റി (കെഐജിഇ) ജെൻഡർ പഠനങ്ങൾ, ജെൻഡർ പഠന കേന്ദ്രങ്ങൾ തമ്മിലുള്ള സഹകരണമൊരുക്കൽ എന്നിവയിൽ ശ്രദ്ധ കേന്ദ്രീകരിക്കുന്നു. ആസ്ഥാനം ശ്രീശങ്കര സംസ്‌കൃത സർവകലാശാലയാണ്. തുഞ്ചത്തെഴുത്തച്ഛൻ മലയാള സർവകലാശാല ആസ്ഥാനമാക്കിയ കേരള ലാംഗ്വേജ് നെറ്റ്‌വർക്ക് (കെഎല്‍എൻ) ഭാഷാപഠനം, വിവർത്തനം, വിദേശഭാഷാ പരിശീലനം എന്നിവയിലൂന്നി പ്രവർത്തിക്കും.
സെന്റർ ഫോർ ഇൻഡിജനസ് പീപ്പിൾസ് എഡ്യൂക്കേഷൻ (സിഐപിഇ) തദ്ദേശീയ ജനതയുടെ വിദ്യാഭ്യാസ പ്രശ്‌നങ്ങൾ പരിഹരിക്കുന്നതിന് ലക്ഷ്യമിടുന്നു. കാലിക്കറ്റ് സർവകലാശാലയുടെ വയനാട് ആദിവാസി പഠനകേന്ദ്രവുമായി സംയോജിപ്പിച്ചാണ് പ്രവര്‍ത്തനം, കേരള നോളജ് കൺസോർഷ്യം (കെകെസി) വിജ്ഞാന സമൂഹം കെട്ടിപ്പടുക്കാനും അക്കാദമിക്-വ്യവസായ‑സാമൂഹ്യ സഹകരണം പ്രോത്സാഹിപ്പിക്കാനും ലക്ഷ്യമിടുന്നു. ഇതിന്റെ ആസ്ഥാനം കേരള സംസ്ഥാന ഉന്നതവിദ്യാഭ്യാസ കൗൺസിലാണ്.

കേരള സെന്റർ ഫോർ അനലിറ്റിക്കൽ സർവീസസ് (കെസിഎഎസ്) സംസ്ഥാനത്തെ അധ്യാപകർ, വിദ്യാർത്ഥികൾ എന്നിവർക്ക് സമഗ്രമായ സാങ്കേതിക പിൻതുണയും ഗവേഷണ സഹായവും നൽകും. ഗവേഷണത്തിനും പ്രായോഗിക ഭരണത്തിനും ഇടയിൽ പാലമായി വർത്തിച്ച് ഭരണരംഗത്ത് ഫലപ്രദമായ പൊതുനയങ്ങൾ രൂപപ്പെടുത്തുന്നതിനു സഹായകരമായി പ്രവർത്തിക്കുന്ന ഉന്നതവിദ്യാഭ്യാസ കേന്ദ്രമായി കേരള ഇൻസ്റ്റിട്യൂട്ട് ഓഫ് പോളിസി സ്റ്റഡീസ് (കെഐപിഎസ്) പ്രവർത്തിക്കും. കഴിഞ്ഞ മൂന്നുവർഷം സംസ്ഥാന പ്ലാൻ ഫണ്ടിൽ നിന്ന് ലഭിച്ച 2,718 കോടി രൂപയും കിഫ്ബിയുടെ 1,844 കോടി രൂപയ്ക്ക് 65 പ്രൊജക്റ്റുകളും റൂസ വഴി 532 കോടി രൂപയ്ക്ക് 158 പ്രൊജക്റ്റുകളും നടപ്പാക്കിയത് ഉന്നത വിദ്യാഭ്യാസ മേഖലയിലെ അടിസ്ഥാനസൗകര്യ വികസനത്തിനും ഗുണനിലവാര വർധനവിനും വഴിയൊരുക്കി. ഇതിനൊപ്പം, വിദേശ വിദ്യാർത്ഥികളെ ആകർഷിക്കാനുള്ള ‘സ്റ്റഡി ഇൻ കേരള’ പദ്ധതി സംസ്ഥാനത്തെ ആഗോള വിദ്യാഭ്യാസ കേന്ദ്രമാക്കി മാറ്റുന്ന നിർണായക ചുവടുവയ്പായും മാറും.