ചുണ്ണാമ്പു തേക്കാത്ത ഒരു ദിനം

ഇക്കഴിഞ്ഞ മാസത്തില്ലൊരുദിനം
ഞായറാഴ്ചയാണോർക്കുന്നതിപ്പൊഴും
അവധിയാലസ്യമൊക്കെക്കുടഞ്ഞെറി-
ഞ്ഞന്നു ഞാനെഴുന്നേറ്റൂ — ‘മണി പത്ത്’
കൈകൾ നീണ്ടൂ പതിവുപോൽ കട്ടിലി-
ന്നറ്റമുള്ളോരു പീഠത്തിൽത്തപ്പുവാൻ
ചൂടു ‘വാട്സ്ആപ്പു’ കാണാതെയില്ലല്ലോ
ഒരു ദശാബ്ദമായ് ദൈനംദിനങ്ങളും
വിരലിനറ്റത്തു ചില്ലിൻ മിനുസത്തി-
നന്നുപകരമായ് കൊണ്ടതു കൂർപ്പുകൾ
ഞൊടിയിൽ ഞെട്ടിപ്പരതുമ്പോൾ കണ്ടതോ
ഉരുകി നീറിയ പ്ലാസ്റ്റിക്കിനുണ്ടകൾ
പോയ രാത്രിയിൽ വെട്ടിയിറങ്ങിയോ-
രിന്ദ്രവജ്രായുധത്തിലെരിഞ്ഞു ഫോൺ
ഇല്ല ചാർജറും കേബിളും, ബാക്കിയായ്
പൊടിപൊടിഞ്ഞൊരു ബാറ്ററി മാത്രമേ
‘അയ്യോ അച്ഛാ! പണീ കിട്ടി മൊത്തത്തി’ -
ലെന്നലറിക്കൊണ്ടോടുന്നു മക്കളും
‘എങ്ങനിന്നു ഞാൻ ഇൻസ്റ്റയിൽ പോസ്റ്റിടു’ -
മെന്നു ചൊല്ലിക്കരയുന്നു ഭാര്യയും
ലോണുകൾ തീർത്തു, കീശയും കാലിയായ്
ശമ്പളത്തിനായ് നാലുനാൾ കാക്കണം
നീറ്റിൽനിന്നും പുറത്തിട്ട മീനുപോൽ
വീർപ്പുകിട്ടാതെ തെല്ലിട നിന്നുഞാൻ
o o o o o o

പല്ലുതേച്ചു, പ്രഭാതകൃത്യം കഴി-
ഞ്ഞന്നിരുന്നുഞാനുമ്മറക്കോലായിൽ
വെയിലുതട്ടിത്തിളങ്ങുന്ന തുള്ളികൾ
തീർത്തിടുന്നൂ മഴവില്ലിൻ മായകൾ
മധുനുകരുവാനുള്ളോരു വെമ്പലിൽ
കുരുവിയാൽ വിറച്ചാടുന്നു തെച്ചിയും
കാതിനിമ്പമായ് കേൾക്കാവു ദൂരെനി-
ന്നൊരു കുയിലിന്റെ ശൃംഗാര കൂജനം
എവിടെയായിരുന്നൊരു പതിറ്റാണ്ടായി-
ട്ടിപ്പൊഴീ കേട്ട ശ്രാവ്യമധുരങ്ങൾ?
എവിടെയായിരുന്നീ ദൃശ്യരാജിക-
ളെന്നൊരുഞൊടി ചിന്തയിലാണ്ടു ഞാൻ
പൊടിപിടിച്ചുകിടന്നോരു പന്തെടു-
ത്തങ്ങുമിങ്ങുമായ് തട്ടുന്നു പുത്രന്മാർ
ഒരു പരീക്ഷണമെന്നപോൽ നാടനാം
പാചകവിധി തേടുന്നു പത്നിയും
തൊടിയിലൂടെ നടന്നൂ, അലക്ഷ്യമായ്
മുമ്പുകൈവിട്ട സ്മൃതികളും തേടിഞാൻ
നെടിയൊരിടിവാളു തന്നോരു സൗഭാഗ്യ-
മിത്രമേൽ മധുരമേകുമോ ജീവനിൽ?
ആണ്ടുപലതായ്ക്കളഞ്ഞുകുളിച്ചൊരാ
നഷ്ടസൗഗന്ധമാഗതമായെന്നിൽ